O‘zbekiston chempionati oliy ligasida 5-tur uchrashuvlari ortda qoldi. O‘tgan yili elitadagi o‘rnini saqlab qolgan «So‘g‘diyona» dastlabki 4ta uchrashuvda bor-yo‘g‘i 3 ochko jam-g‘ardi.
Jizzaxliklarning natijalari salbiy ko‘rinish olishiga, qaysidir ma’noda, qur’aning omadsiz kelgani ham sabab bo‘ldi. Davron Fayziyev shogirdlari ketma-ket «Bunyodkor» va «Lokomotiv» klublariga qarshi safarda maydonga tushishdi.
Biz 5-tur uchrashuvi oldidan jamoaning yangi a’zosi Alisher Mahmudovdan intervyu oldik. Ta’kidlash jo-iz, ushbu futbolchi uchun «So‘g‘diyona» begona emas. U bir necha yil avval Jizzax klu-bi sharafini himoya qilgandi.
- Alisher, yil boshida «Navbahor»ni tark etdingiz. Bunga nima sabab bo‘ldi?
- Jamoa bosh murabbiyi bilan kelisha olmadik, fikrimiz bir joydan chiqmadi. Namangandan ketishimning asosiy sababi ham shu. Vaziyat ijobiy tomonga o‘zgarmagach, «Navbahor»dan ketishga qaror qildim.
- Nima sababdan chiqisha olmadinglar? Balki, bosh murabbiyga o‘yin uslubingiz to‘g‘ri kelmagandir?
- Menimcha ham shunday.
- Faqat shumi sababi?
- Murabbiy menga ishonch bildirmadi. Oxir-oqibat ketishga majbur bo‘ldim.
- Shartnomangiz yakuniga yetganmidi?
- Ha.
- «Navbahor» rahbariyatining sizdan qarzi bormi?
- Yo‘q. Men bilan hisob-kitob ishlari to‘liq amalga oshirilgan.
- Uzoq vaqt «Navbahor» sharafini himoya qildingiz. Ketish oson bo‘lmagandir?
- Albatta. Jamoa va uning muxlislari men uchun qadrdon bo‘lib qolishgan. Lekin bu - hayot. Futbolchining qismati shunday.
- Mavsum avvalida «Alisher «Buxoro»ga o‘tar ekan», degan xabarlar ham paydo bo‘lgandi...
- Yo‘q, bu jamoadan taklif olmagandim. Mazkur xabar meni ham hayron qoldirdi.
- «So‘g‘diyona»dan tushgan taklif sizni nimasi bilan o‘ziga jalb qildi?
- Bu jamoada avval ham o‘ynaganman. Eng asosiysi, menga Davron Fayziyevning o‘zi taklif bilan chiqdi. Bu insonni ham futbolchi, ham murabbiy sifatida hurmat qilaman.
- Boshqa klublardan taklif tushmadimi?
- Yana ikkita jamoa qiziqish bildirdi, lekin «So‘g‘diyona»ni ulardan ustun qo‘ydim.
- Qancha muddatga shartnoma imzoladingiz?
- Kelishuv bir yilga mo‘ljallangan.
- Alisher, bizda asosan bir yillik shartnomalar imzolanadi. Bunga munosabatingiz qanday?
- Albatta, kelishuv uzoqroq muddatga tuzilishi tarafdoriman. Shunda jamoaviy o‘yin shakllanadi, buning natijasida o‘sha klub kuchayadi.
- Eng yirik shartnomangiz qancha muddatga tuzilgan?
- «Paxtakor»ning yoshlar jamoasida o‘ynab yurgan kezlarim 5 yillik bitimga imzo chekkandim.
- Kelishuv yakunigacha «sherlar» safida o‘ynaganmisiz?
- Yo‘q. O‘sha payt «So‘g‘diyona» transfer huquqimni to‘laligicha sotib olgandi.
- Oradan bir necha yil o‘tib yana shu klubga qaytdingiz. Xo‘sh, Jizzax futbolida ijobiy o‘zgarish ko‘zga tashlandimi?
- Albatta, bor. Yangi, zamonaviy stadion bunyod etildi. Bu arenada O‘zbekiston kubogi final uchrashuvi o‘tkazildi, unda barcha sharoitlar yaratilgan.
- Moliyaviy tomondan-chi?
