Mavsumlar oralig‘ida tarkibini sezilarli darajada kuchaytirgan «Qizilqum» Oliy ligada yaxshi start olmagan bo‘lsada, 5-turda muxlislarga «syurpriz» ulashdi. Jasur Hasanov, Artur Gevorkyan, Erkin Boydullayev, Azamat Allaniyozov, Vohid Shodiyev kabi tajribali, sovrindor futbolchilarga ega Navoiy klubi Toshkentda «Bunyodkor»ni mag‘lubiyatga uchratdi. Darvoqe, klub rahbariyati poytaxt safari oldidan Navoiy shahridagi «Yoshlar» sport majmuasida futbolchilar va muxlislar ishtirokida maxsus uchrashuv o‘tkazgandi. Unda so‘z olgan «Qizilqum» ustozi Hamidjon Aktamov g‘alaba va mag‘lubiyat yonma-yon yurishi, muvaffaqiyatsiz vaqtincha ekanligini ta’kidlagandi. Mana, 5-turda uning gaplari o‘z tasdig‘ini topdi. Biz Toshkentdagi o‘yin oldidan «Qizilqum» tarkibiga mavsumlar oralig‘ida qo‘shilgan yangi futbolchilardan biri Shukurali Po‘latovni suhbatga tortib, turli savollarga javob olgandik.
- Shukurali, o‘tgan mavsum «Neftchi» safida o‘ynadingiz. Lekin yakunda jamoaning bir qator yetakchilari, xususan, Mansur Saidov qatori siz ham Farg‘ona klubi bilan xayrlashdingiz. Buning asosiy sababi...?
- Fikrim qanday tuyulishini bilmadimu, nazarimda, ko‘pchilik yigitlar «Neftchi»da o‘ynashni xohlashadi. Ammo futbolchining faoliyati qanday davom etishini hech kim bilmaydi. Aksariyat holatlarda klub rahbarlari va murabbiylarning o‘zgarishi futbolchilarning keyingi taqdiriga sezilarli darajada ta’sir qiladi. Hozir «Neftchi»dan nima uchun ketganim sababini ochiq aytolmayman. Zero, ayni paytda «Qizilqum»daman va bor e’tiborim shu klub muvaffaqiyatlariga hissa qo‘shishga qaratilgan.
- Avvalgi intervyularingizdan birida «Neftchi» vakillari klubda qolishingizni istashmaganiga sha’ma qilgandingiz. Demak, klub bilan majburan xayrlashgansiz, shundaymi?
- To‘g‘ri, «Neftchi»da qolishim faqat o‘zimga bog‘liq emasdi. Ketishimning o‘zi xos sabablar bor. Umuman, jamoani o‘zim istamagan holda tark etdim...
- O‘zi shartnomangiz muddati yakuniga yetganmidi? «Neftchi» rahbariyati siz bilan to‘liq hisob-kitob qildimi?
- Ha, kelishuvimiz tugagandi. Ikkinchi savolga esa javob berolmayman. Ochig‘i, bu masalada gapirishni ham xohlamayman. Hammaga insof bersin...
- Endi «Qizilqum» haqida: jamoa taklifi sizni nimasi bilan qiziqtirdi?
- «Qizilqum» safiga Hamid aka Aktamovning chorloviga asosan qo‘shildim. O‘sha vaqt jamoa tarkibi tajribali, yuqori saviyali futbolchilar bilan to‘ldirilayotgandi. Aynan shuni nazarda tutib, 1 yillik shartnoma bo‘yicha taklifni qabul qildim.
- Adashmasak, ayni o‘sha payt «Navbahor»dan ham taklif olgan edingiz.
- Ha, chorlov bo‘lgandi. Namanganda butun vodiydagi kabi futbolni juda yaxshi ko‘rishadi. Aslida «Navbahor»ga o‘tishim ham hech gap emasdi. Biroq so‘nggi pallada «Qizilqum» varianti ma’qulroq ko‘rindi. Boshqa gap yo‘q.
- «Qizilqum» chempionatni biroz sust boshladi. Vaholanki, jamoa tarkibi chakki emas. Startdagi omadsizlikni qanday izohlaysiz? O‘yinlarni tahlil qilib ko‘rdinglarmi?
- Afsuski, mavsumni omadli boshlay olmadik. Qayd etilgan natijalar biz uchun mos emas. Shaxsiy fikrim, mag‘lubiyatli o‘yinlarda jamoamizga shunchaki, omad yetishmadi. To‘g‘ri, umumiy tushunchaga ko‘ra, omad kuchlilarga kulib boqadi. Lekin shaxsan men bu fikrga to‘liq qo‘shilmayman. Axir siz tepgan to‘p darvozaga kiravermasa, aksincha, raqibning bittagina zarbasi gol bilan tugasa - bu haqiqiy omadsizlik sanalmaydimi? Tushunarliki, tarkibimizda tajribali futbolchilar ko‘p. O‘yin amaliyoti masalasida ham muammo yo‘q. Umidvormanki, keyingi o‘yinlarda o‘zimizni o‘nglab, navoiylik muxlislarni chiroyli futbol va g‘alabalar bilan xushnud etamiz.
- Jamoangiz 3-4-turlarda «Qo‘qon-1912» va «Buxoro»ga imkoniyat boy berdi. Ketma-ket mag‘lubiyat, boz ustiga, ikkinchisini o‘z maydoninglarda qabul qildinglar. Bundan kerakli xulosa chiqarildimi?
- Ha, albatta. Xususan, o‘yinlarni qayta ko‘rib chiqib, kamchiliklarni atroflicha muhokama qildik. Mashg‘ulotlarda ayni shu xatolar ustida ishlayapmiz. O‘ylaymanki, omadsiz davr ortda qoldi. Aslida shu uchrashuvlarda ham mag‘lubiyatga loyiq harakatlanmagandik. Deylik, «Buxoro»ga qarshi o‘yin juda qiziqarli kechdi va yetarlicha xavfli vaziyatlarni yuzaga keltirdik. Afsuski, omad qo‘llamasa qiyin ekan... Yuqorida aytgan gapimga tasdiq: mehmonlar darvozamiz tomon bir martagina aniq zarba yo‘llashdi va u gol bilan tugadi. Biz aksincha, golga tortadigan behisob hujumlardan samara chiqarolmadik. Agar vaziyatlarning yarmidan ham foydalanganimizda edi, yirik hisobda g‘alaba qozonardik.
- Toshkentga kelishdan oldin klub rahbariyati va muxlislar o‘rtasida alohida uchrashuv tashkil etildi. Unda muxlislar sizlarni keskin savollar bilan qiynab qo‘yishmadimi?
- Uchrashuv do‘stona ruhda kechdi va muxlislar barcha savollariga tegishli javoblar olishdi. Umid qilamanki, «Qizilqum» hali o‘z so‘zini aytadi.
