“Barselona” CHLning chorak finalida “Yuventus” bilan to‘qnash keldi. Ilk o‘yinda 3:0 hisobida turin klubi g‘alaba qozondi. Biz kataloniyaliklarning Chempionlar ligasida Italiya klublariga qarshi statistikasi bilan qiziqdik.
Quyida bu borada 15 ta faktni e’tiboringizga havola etamiz.
1. “Barselona” jamoasi shu kunga qadar Italiyaning 6 ta jamoasi bilan to‘qnash kelishgan. Bular: “Inter”, “Yuventus”, “Fiorentina”, “Udineze”, “Roma” va “Milan”.
2. “Barsa” Italiya jamoalari bilan jami 37 marta to‘qnash kelib, 17 bora zafar quchgan va 8 marta mag‘lubiyat alamini chekib ko‘rgan. To‘plar nisbati 64:44.
3. Kataloniyaliklar bilan eng ko‘p to‘qnash kelgan klub “Milan”dir. “Rossoneri” “ko‘k anorranglilar” bilan jami 17 marta raqib bo‘lib, 4 ta g‘alaba va 8 ta mag‘lubiyatni qayd etishgan.
4. “Fiorentina” va “Udineze” “Barsa” bilan 2 marta to‘qnashib, birorta g‘alabaga erishishmagan.
5. “Udineze” kataloniyaliklardan ochko ola bilmagan Italiyaning yagona jamoasi hisoblanadi.
6. Italiya klublari “Kamp Nou”ga 17 marta tashrif buyurib atigi 2 bora g‘alaba qozonishgan. Qolgan 12 bahsda mezbonlarning qo‘li baland kelgan va 3 tasida murosa ko‘chasi tanlangan.
7. “Kamp Nou”da 2000 yili “Milan”, 2003 yili “Yuventus” g‘alaba bilan qaytgan.
8. “Barselona” Italiyaliklar bilan pley-off bosqichlarida 7 marta to‘qnash kelib, ularning 5 tasida yakunda keyingi bosqichga yo‘l olishgan. 2003 yili “Yuventus” va 2010 yili “Inter” pley-offda “Barsa”dan ustun kelgan.
9. Kataloniyaliklar CHL finallarida ikki bora italiyaliklar bilan raqib bo‘lishgan. 1994 yili “Milan” “Barsa”ni 4:0 hisobida taslim qilgan bo‘lsa, 2015 yili “ko‘k anorranglilar” “Yuve”dan 3:1 hisobida ustun kelishgan.
10. “Milan” 2 marta, “Inter”, “Roma”, “Fiorentina” va “Yuventus” bir martadan “Barsa” darvozasiga 3 tadan gol kiritishgan.
11. “Milan”, “Roma” va “Yuventus” bir martadan “Barselona” ustidan yirik hisobda g‘alaba qozonishgan.
12. “Barselona” jamoasi “Milan”ni 3, “Inter”, “Roma” va “Udineze”ni bir martadan yirik hisobda taslim etgan.
