"Bunyodkor” – “Al-Ahli” uchrashuvi oldidan tashkil etilgan matbuot anjumanida mehmonlar ustozi va jamoa darvozaboni qatnashdi.

- Ertangi bahs biz uchun juda muhim. Guruh bosqichi yakuniga yetmoqda. Ochkolar sarhisob qilinadigan pallada turibmiz. “Bunyodkor”ning keyingi bosqichga chiqish imkoniyati yo‘qolgan bo‘lsa-da, raqib o‘z obro‘sini saqlash uchun g‘alabaga o‘ynaydi, deb o‘ylayman. O‘z navbatida “Al-Ahli” ham faqat g‘alaba qozonish uchun maydonga chiqadi. Osiyo Chempionlar ligasi qit’aning eng nufuzli turniri hisoblanadi. Bizda ichki chempionat yakunlangan bo‘lishiga qaramasdan, muxlislarimizni xalqaro turnirda xursand qilishga harakat qilamiz. Saudiya Arabistoni chempionatida saviyali va bir-birlariga munosib jamoalar ko‘p. Aniqrog‘i raqobat kuchli. Chempionlar ligasida esa biroz boshqacharoq. “Bunyodkor”ning biron futbolchisini ajratib o‘tirmoqchi emasman, raqib jamoa sifatida kuchli, - dedi “Al-Ahli” ustozi Kristian Gross.

- Ertaga qo‘lga kiritiladigan uch ochko bizni keyingi bosqichga olib chiqishi mumkin. Raqibning ustun tomoni shuki – ularda bosim yo‘q. Murabbiylar tomonidan beriladigan ko‘rsatmalarni to‘liq bajarsak maqsadimizga erishamiz, - dedi “Al-Ahli” posboni Yosir Al-Musaylim.