Bugun futbol bo‘yicha Oliy liganing 8-tur bahslari davom ettiriladi. "Lokomotiv" o‘z maydonida poytaxtning boshqa bir klubi "Obod"ni qabul qiladi.

Oliy liga, 8-tur.
LOKOMOTIV - OBOD
Hakamlar: Ilgiz Tantashev (Buxoro), Andrey Sapenko, Bobir Qodirov.
Zahira hakami: B. Yulcharayev
Nazoratchi: A. Klepikov
PFL vakili: Ahrol Inoyatov
29 aprel. "Lokomotiv" stadioni. 18:00

Turnir jadvalida "Lokomotiv" 15 ochko bilan birinchi o‘rinda ketmoqda. Raqibimiz "Obod" esa 5 ochko bilan 14-o‘rinni egallab turibdi. "Lokomotiv" oltita o‘yinning beshtasida g‘alaba qozonib, bir bor mag‘lubiyatga uchragan. "Obod" esa yetti bor maydonga tushib, bir marta zafar quchgan, ikki bor durang o‘ynagan holda to‘rtta o‘yinda yutqazgan.

FAKT: "Lokomotiv" shu paytgacha "Obod" bilan ikki marta o‘zaro bahs olib borgan. O‘tgan yil "Jar" stadionida kechgan bahsda "temiryo‘lchilar" 2:0 hisobida g‘alaba qozonib, "Lokomotiv" stadionida bo‘lib o‘tgan o‘yinda esa 1:1 hisobi qayd etilgan.

FAKT: "Obod" bu yilgi oliy ligada eng kam gol urgan to‘rtta jamoadan biri bo‘lib turibdi. Jamoa yettita uchrashuvda faqat to‘rtta to‘p kiritgan. Bunday ko‘rsatkich shuningdek, "Olmaliq", "Neftchi" va "Metallurg" jamoalariga ham tegishli.

FAKT: "Lokomotiv" esa oliy liga klublari orasida eng ko‘p gol urgan jamoa bo‘lib turibdi. Jamoa hisobida 13ta gol bor.

FAKT: "Lokomotiv" o‘z maydonida bo‘lib o‘tgan uchta uchrashuvning hammasida g‘alaba qozongan. "So‘g‘diyona" 3:0, "Olmaliq" 5:0 va "Nasaf" 2:1 hisobida dog‘da qoldirilgan. Jamoamiz uydagi uchta bellashuvda 10ta gol urib, atigi bitta to‘p o‘tkazib yuborgan.

FAKT: Safarda hozircha to‘rt marta maydonga tushgan "Obod" shundan bittasida g‘olib bo‘lgan va uch o‘yinda mag‘lubiyatga uchragan. "Obod" safarda "Buxoro"dan ustun kelgan va "Navbahor", "So‘g‘diyona" va "Nasaf" jamoalariga mag‘lub bo‘lgan.