Ertaga – 5 may kuni Fransiya va Germaniyada hokkey bo‘yicha jahon chempionati start oladi.
O‘yinlar Parijdagi «Akkor Hotels Arena» va Kyolndagi «Lankses Arena» stadionlarida o‘tkaziladi.
«A» guruhi o‘yinlari Germaniyada o‘tkazilib, unda mezbonlardan tashqari Rossiya, AQSH, Shvesiya, Slovakiya, Latviya, Daniya va Italiya terma jamoalari ishtirok etadi.
«V» guruhi o‘yinlari Fransiyada o‘tkaziladi va unda mezbonlar bilan birga Kanada, Finlyandiya, Chexiya, Shveysariya, Belarus, Norvegiya va Sloveniya terma jamoalari ishtirok etadi.
O‘yinlar bir davrali tizimda o‘tkazilib, guruhda dastlabki 4ta o‘rinni egallagan jamoa chorakfinalga yo‘l oladi. Musobaqa 21 may kunigacha davom etadi. Final o‘yini Kyoln shahrida o‘tkaziladi.
Eslatib o‘tamiz, 2016 yilda Rossiyada o‘tkazilgan jahon chempionatida Kanada bosh sovrinni, Finlyandiya 2-o‘rinni, mezbonlar esa 3-o‘rinni qo‘lga kiritgan edi.
