Эртага – 5 май куни Франция ва Германияда ҳоккей бўйича жаҳон чемпионати старт олади.
Ўйинлар Париждаги «Аккор Ҳотелс Арена» ва Кёльндаги «Ланксес Арена» стадионларида ўтказилади.
«А» гуруҳи ўйинлари Германияда ўтказилиб, унда мезбонлардан ташқари Россия, АҚШ, Швеция, Словакия, Латвия, Дания ва Италия терма жамоалари иштирок этади.
«В» гуруҳи ўйинлари Францияда ўтказилади ва унда мезбонлар билан бирга Канада, Финляндия, Чехия, Швейцария, Беларус, Норвегия ва Словения терма жамоалари иштирок этади.
Ўйинлар бир даврали тизимда ўтказилиб, гуруҳда дастлабки 4та ўринни эгаллаган жамоа чоракфиналга йўл олади. Мусобақа 21 май кунигача давом этади. Финал ўйини Кёльн шаҳрида ўтказилади.
Эслатиб ўтамиз, 2016 йилда Россияда ўтказилган жаҳон чемпионатида Канада бош совринни, Финляндия 2-ўринни, мезбонлар эса 3-ўринни қўлга киритган эди.
