Oliy liga 9-turidan o‘rin olgan “Navbahor” - “Lokomotiv” (2:2) o‘yinidan so‘ng mezbonlar ustozi Ilhom Mo‘minjonov o‘z fikrlarini aytdi.
«Uchrashuv og‘ir kechdi. Mashg‘ulotlarda standart vaziyatlar ustida ko‘p ishlagandik. Bugun birinchi golni aynan o‘ylagan rejalarimiz orqali urganimizdan juda ham xursandman. "Lokomotiv"dek jamoadan ochko olish - biz uchun sharaf. Olti o‘yindan buyon bittadan ortiq gol ura olmayotgandik. Bugun bu noxush an’anaga chek qo‘ydik. Lekin, shu bilan birga ikkita gol ham o‘tkazib yubordik. Raqib himoyadagi yo‘l qo‘ygan qo‘pol xatolarimizdan so‘ng gol urdi. Gollardan birida darvozabonning ham aybi borligini ta’kidlashim zarur. Nima bo‘lgan taqdirda ham yigitlarga mag‘lubiyatga uchrayotgan vaziyatdan chiqishgani uchun minnatdorchilik bildirmoqchiman. Qolaversa, bizni ajoyib tarzda tinmay qo‘llab-quvvatlab turgan muxlislarimizga ham rahmat aytaman. Tablodagi hisob o‘yinga mos bo‘ldi deyish mumkin. G‘alaba qozonish uchun nima yetishmadi? Birozgina omad bizdan yuz o‘girdi, deb o‘ylayman. Raqib darvozasi oldida ko‘plab vaziyatlarni sodir etdik. Aziz Turg‘unboyevning o‘yini iliq taassurotlar qoldirdi. U asta-sekin asosiy tarkibdan joy olib bormoqda. Turg‘unboyev kelajagi porloq futbolchilar sirasiga kiradi» - dedi Mo‘minjonov.
