Bu yil Namangan klubi kayfiyati a’lo darajada, jamoa muxlislariniki ham. Ha, «Navbahor»ning shashti mutlaqo boshqacha. Jamoa o‘yiniga mazmun kirgan va u ligadagi har qanday raqib bilan tengma-teng kurashmoqda. 4 may kuni stadionga tushib, «Lokomotiv»ga qarshi o‘yinni kuzatgan muxlislar bunga yana bir karra ishonch hosil qilishdi.
Aslida uchrashuvning murosasiz ruhda kechishini oldindan taxmin qilish qiyin emasdi. Kutilganidek, ilk daqiqalardanoq har ikki jamoa vakillari hujumlarga zo‘r berib, 3 ochko olishni ko‘zlayotganlariga ishora qilishdi. O‘yinning 16-daqiqasiga kelib, muxlislar bilan to‘lib-toshgan stadion larzaga keldi. Bu vaziyatda mezbonlar sardori Dilshod Jabborov burchak to‘pidan so‘ng raqib jarima maydonida yuzaga kelgan sarosimadan foydalanib, hisobni ochdi. Tabiiyki, poytaxtliklar shundan so‘ng hujum sur’atini ko‘tarishdi va bo‘lim o‘rtalarida o‘z maqsadlariga erishishdi. Aniqrog‘i, «Loko»ning hujumkor yarim himoyachisi Sardor Mirzayev o‘ng qanotdan uzatilgan to‘pni boshi bilan Asilbek Omonov darvozasining pastki chap burchagiga aniq yo‘naltirib, o‘rtadagi muvozanatni tikladi - 1:1. Boz ustiga, «temiryo‘lchilar» hisob tenglashgach ham, tinim bilishmadi. Xususan, shu harakatlar evaziga tajribali Marat Bikmayev tanaffusga chiqishga oz fursat qolgan bir pallada jamoasining ikkinchi golini urib, «temiryo‘lchilar»ga ishonch ruhini bag‘ishladi.
Ikkinchi bo‘lim boshlandiki, «lochinlar» tezkor golni tantana qilishdi. Aziz Turg‘unboyev raqib himoyachilari xatosidan foydalanib, jarima maydoni yaqinida to‘pni egallab oldi va Ma’mur Ikromov bilan deyarli birga-bir vaziyatga chiqib bordi. Uning yakuniy harakati ham chiroyli chiqdi - 2:2. Qolgan vaqt davomida har ikki tomon yetarli daraja xavfli vaziyatlar yaratgan bo‘lsada, natija o‘zgarmay qoldi. Xullas, jangovar ruhdagi kurash murosa bilan xotima topdi.
Fakt. «Navbahor»
