Oliy liganing 10-turida Namanganda “Navbahor” va “Qo‘qon-1912” o‘rtasidagi vodiy derbisi bo‘lib o‘tadi.
Ushbu jamoalarning chempionatdagi bahslariga doir ma’lumotlar bilan tanishtirib o‘tamiz.
O‘zaro o‘yinlar
Bu jamoalar shu kunga qadar Oliy liga doirasida 22 marta o‘zaro maydonga tushishgan. O‘yinlarning 15 tasida “Navbahor” g‘alaba qozongan. Uchta uchrashuv durang natijasi bilan yakunlangan. To‘rtta bahsda qo‘qonliklarning qo‘li baland kelgan. To‘plar nisbati 49-24, “Navbahor” foydasiga. O‘zaro o‘yinlarda namanganliklar 48 ochko jamg‘arishgan. Qo‘qonliklarning bu boradagi ko‘rsatkichlari 15 ochkoga teng.
Namanganda o‘tgan so‘nggi beshta uchrashuv:
14.05.2016 Navbahor – Qo‘qon -1912 – 2:1
21.10.2015 Navbahor – Qo‘qon -1912 – 2:1
11.06.2003 Navbahor – Qo‘qon -1912 – 5:1
06.04.2002 Navbahor – Qo‘qon- 1912 – 2:0
26.06.2000 Navbahor – Temiryo‘lchi – 5:4
Uchrashuv hakamlari
Namanganda bo‘lib o‘tadigan “Navbahor” – “Qo‘qon-1912” jamoalari o‘rtasidagi bahsning mamlakatimizning eng yaxshi referilaridan biri – Valentin Kovalenko boshchiligidagi hakamlar guruhi boshqarib boradigan bo‘ldi. O‘yin nazoratchisi Sayfiddin Ermatov.
Ushbu hakam 7 aprel kuni Qo‘qonda bo‘lib o‘tadigan “Qo‘qon-1912” – “Dinamo” uchrashuvinini boshqargandi. O‘sha o‘yinda vakillarimiz 2:1 hisobida g‘alaba qozonishgandi.
Navbatdagi vodiy derbisida vakillarimizga omad tilab qolamiz.
Eslatib o‘tamiz Namangandagi "Navbahor" - "Qo‘qon-1912" jamoalari o‘rtasidagi uchrashuv 12-may soat 18-00 da boshlanadi. Bugun soat 16-00 da ushbu jamoalarning o‘rinbosarlar tarkiblari bellashadilar. Har ikki uchrashuv Namangandagi "Markaziy" stadionida bo‘lib o‘tadi.
