«Monako» hujumchisi Kilian Mbappe o‘z kelajagi to‘g‘risida bir to‘xtamga kelgan ko‘rinadi. Harqalay, Marca nashri ma’lumotlariga qaraganda, u faoliyatini «Real»da davom ettirmoqchi.
Mbappening aynan «Real»ni tanlashiga hamyurti Zayniddin Zidanning bosh murabbiy ekanligi va klubning loyihalari sabab sifatida ko‘rsatilmoqda. Oldinroq «MYU»ning bu yigit uchun 85 million yevro taklif qilgani to‘g‘risida xabarlar tarqalgandi. Biroq «Monako» uni 120 milliondan kamiga qo‘yib yubormoqchi emas.
Eslatish joiz, Kilian va «Monako» o‘rtasidagi kelishuv muddati 2019 yilning yozida nihoyasiga yetadi. Darvoqe, «Real» bosh murabbiyi Zidan jurnalistlarning Mbappe haqida bergan savollariga keskin ohangda javob berdi.
«Mbappeni «Real»ga o‘tayotgani xususida eshitdim. Bu kulguli. Avval ham aytganman, u o‘smirlik chog‘i Madridga kelishi mumkin edi, ammo o‘zi xohlamadi. Ha, Mbappe zo‘r mavsumni o‘tkazmoqda, ammo men faqat qo‘l ostimdagi futbolchilar haqida gapirishni istayman. Boshqa jamoalar vakillariga to‘xtalishim nojoiz»,-dedi Zidan.
