Ozarbayjonning Boku shahrida davom etayotgan "Islom birdamlik o‘yinlari"da hamyurtlarimiz dastlabki medallarni qo‘lga kiritishdi.
Karate yo‘nalishida hamyurtimiz Sadriddin Saymatov final bosqichida g‘alaba qozonib O‘zbekiston delegasiyasi hisobiga birinchi oltin medalni yozdirib qo‘ydi.
60 kilogramm vazn toifasida turkiyalik Aykut Kayaga qarshi bahs olib borgan karatechimiz 1:2 hisobida mag‘lub bo‘lib turgan bir vaziyatda ipon ishlab oldi va hisobni 4:2 ko‘rinishiga o‘zgartira oldi hamda g‘alabani raqibidan ilib ketdi.
"Islom birdamlik o‘yinlari"ning 10 metr masofadan pnevmatik miltiqdan o‘q otish yo‘nalishida hamyurtimiz Sakina Mamedova bronza medali sohibiga aylandi.
“Baku Shuting Centr” inshoatida bo‘lib o‘tgan bahslarda hamyurtimiz eronlik sportchilardan keyingi pog‘onani egalladi.
Mazkur yo‘nalishda Emamgholi Nejad Ande Narjes oltin medal sohibi bo‘lgan bo‘lsa, Elaheh Ahmadi kumush medalini qo‘lga kiritdi.
Dzyudo bo‘yicha 60 kilogramm vazn toifasida marokashlik Yassine Moudatirga qarshi tatamiga chiqqan Diyorbek O‘rozboyev bronza medali uchun kechgan bahsda vazari bahosi evaziga zafar quchdi va terma jamoamiz hisobiga uchinchi bronza medalini qo‘shib qo‘ydi.
