Озарбайжоннинг Боку шаҳрида давом этаётган "Ислом бирдамлик ўйинлари"да ҳамюртларимиз дастлабки медалларни қўлга киритишди.
Карате йўналишида ҳамюртимиз Садриддин Сайматов финал босқичида ғалаба қозониб Ўзбекистон делегацияси ҳисобига биринчи олтин медални ёздириб қўйди.
60 килограмм вазн тоифасида туркиялик Айкут Каяга қарши баҳс олиб борган каратечимиз 1:2 ҳисобида мағлуб бўлиб турган бир вазиятда ипон ишлаб олди ва ҳисобни 4:2 кўринишига ўзгартира олди ҳамда ғалабани рақибидан илиб кетди.
"Ислом бирдамлик ўйинлари"нинг 10 метр масофадан пневматик милтиқдан ўқ отиш йўналишида ҳамюртимиз Сакина Мамедова бронза медали соҳибига айланди.
“Баку Шутинг Cентр” иншоатида бўлиб ўтган баҳсларда ҳамюртимиз эронлик спортчилардан кейинги поғонани эгаллади.
Мазкур йўналишда Эмамгҳоли Нежад Анде Наржес олтин медал соҳиби бўлган бўлса, Элаҳеҳ Аҳмади кумуш медалини қўлга киритди.
Дзюдо бўйича 60 килограмм вазн тоифасида марокашлик Яссине Моудатирга қарши татамига чиққан Диёрбек Ўрозбоев бронза медали учун кечган баҳсда вазари баҳоси эвазига зафар қучди ва терма жамоамиз ҳисобига учинчи бронза медалини қўшиб қўйди.
