O‘zbek futboli afsonalaridan biri – Abduraimov Birodar Hasanovich bugun, 14 may kuni 74 yoshga to‘ldi.
O‘zbekiston Respublikasida xizmat ko‘rsatgan murabbiy, sport ustasi, XX asrning eng yaxshi futbolchilaridan biri sifatida tan olingan Birodar Abduraimov “Shuhrat” medali, “O‘zbekiston iftixori” faxriy unvoni sohibi sanaladi.
Afsonaviy futbolchi 1968 yili sobiq Ittifoq chempionatining Oliy liga, 1972 yili esa Birinchi liga to‘purari bo‘lgan. Birodar Abduraimov “Paxtakor” safida 358 uchrashuvda maydonga tushib, bu borada rekord o‘rnatgan. U sobiq Ittifoq olimpiya terma jamoasi safida ham to‘p surgan.
Katta murabbiy sifatida 1994 yilgi Osiyo o‘yinlarida O‘zbekiston terma jamoasining g‘olib bo‘lishiga o‘z hissasini qo‘shgan. Birodar Abduraimov o‘zbek futboli tarixida mamlakat chempionati va xalqaro o‘yinlarda 200 ta gol kiritgan birinchi futbolchi sifatida qayd etilgan.
Futbolchilik faoliyati davomida Birodar Abduraimov 1960–1968 hamda 1970–1974 yillarda “Paxtakor”, 1969/70 yilgi mavsumda Moskvaning SSKA sharafini himoya qilgan.
1977 yildan O‘zbekiston klublarida murabbiy sifatida ishlagan. 1994–1995 yillarda Rustam Akramov bilan birgalikda O‘zbekiston milliy terma jamoasini boshqargan.
Uning o‘g‘il farzandlari Azamat, Jasur, Bahodir va Botir Abduraimovlar ham mashhur futbolchi va murabbiylarga aylandi.
Xususan, Jasur Abduraimov 2016 yili O‘zbekiston U-19 terma jamoasi bilan Osiyo chempionatida ishtirok etdi va chorak finalga qadar yetib bordi.
Ayni vaqtda Jasur Abduraimov Toshkentning “Paxtakor” klubiga bosh murabbiylik qilmoqda.
