Kecha Formula 1 poygalari bo‘yicha 2017 yilgi mavsumning 5-bosqich bahslari bo‘lib o‘tdi.
Ispaniyaning Barselona trassasida bo‘lib o‘tgan poygada g‘oliblik uchun kurash kutilganidek "Mercedes" va "Ferrari" poygachilari o‘rtasida bo‘lib o‘tdi. Bahs avvalida, "Ferrari" poygachisi Kimi Raykonen "Red Bull" a’zosi Maks Ferstappen bilan to‘qnashib ketdi. Oradan biroz vaqt o‘tgach, "Mercedes"ning finlyandiyalik piloti Valtteri Bottas dvigatelidagi muammo sabab poygani erta yakunlashga majbur bo‘ldi.
G‘oliblik uchun kurash esa Lyuis Hemilton va Sebastyan Fettel o‘rtasida kechdi va unda germaniyaliklar taktik reja evaziga "Ferrari" jamoasini dog‘da qoldira olishdi. Shinalardagi farq evaziga Hemilton raqibini birinchi burulishda ortda qoldirib poyga oxiriga qadar uni o‘ziga yaqinlashtirmaslikka muvaffaq bo‘ldi va mazkur mavsumdagi ikkinchi Gran Prisida g‘olib bo‘ldi.
Shu tariqa chempionatda Fettel va Hemilton orasidagi farq 6 ochkogacha qisqargan bo‘lsa, konstruktorlar poygasida "Mercedes" eng yaqin ta’qibchidan 8 ochkoga ilgarilab ketdi.
Keyingi Gran Pri Monakoning "Monte-Karlo" trassasida ikki haftadan so‘ng bo‘lib o‘tadi.
Formula 1. Barselona Gran Prisi
1. Lyuis Hemilton (Mercedes) – 1:35:56.497
2. Sebastyan Fettel (Ferrari) – 1:35:59.987 +3.490
3. Daniel Rikyardo (Red Bull) – 1:37:10.475 +1:13.978
