Afonin o‘yinda, Denisov esa dam oldi. Rossiya chempionati 28-turida ikki futbolchimiz maydonda o‘zaro to‘qnash kelishi mumkin edi. Zero, «Lokomotiv» o‘z maydonida «Orenburg»ni qabul qildi. Ammo moskvaliklar vakili Vitaliy Denisov bu safar maydonga tushmadi. «Orenburg» a’zosi Vadim Afonin esa asosiy tarkibdan joy olib, 58-daqiqaga qadar to‘p surdi. Natijaga kelsak, «temiryo‘lchilar» yirik hisobda g‘alaba qozonishdi - 4:0.
Finishga durang bilan. BAA milliy chempionati ham nihoyasiga yetdi. «Al-SHabab» klubi so‘nggi turda «Al-Vahda»ni qabul qilib, 1:1 hisobi bilan cheklandi. Hamyurtimiz Aziz Haydarov mazkur o‘yinda ham «Al-SHabab»ning boshlang‘ich tarkibida maydonga tushdi va to‘liq vaqt harakatlandi. «Shabab» chempionat davomida 30 ochko to‘plab, 8-o‘rinni egalladi. Aziz esa jamoasining 22ta o‘yinida qatnashdi, ammo unga gol urish nasib etmadi. BAA chempionati yakuniga ko‘ra, sovrindorlar uchligi quyidagicha ko‘rinish oldi: 1-o‘rin - «Al-Jazira», 2-o‘rin - «Al-Vasl», 3-o‘rin - «Al-Ahli».
Krimes qachon maydonga tushadi? «Pekin Guoan» murabbiylari Xitoy chempionati 9-turi doirasida «Yanbyan Fude»ga qarshi kechgan safar o‘yinida ham hamyurtimiz Yegor Krimesga ehtiyoj sezishmadi. Umuman olganda, milliy jamoamiz himoyachisi joriy mavsum hali biror marta maydonga tushmadi. O‘yin natijasiga kelsak, pekinliklar ortga 2:1 ko‘rinishidagi g‘alaba bilan qaytib, o‘z ochkolari sonini 14taga yetkazib qo‘yishdi. «Chanchun Yatay» esa safarda peshqadam - «Guanjou Evergrand»ga 0:1 hisobida imkoniyatni boy berdi. Chanchunliklar sharafini himoya qilayotgan Anzur Ismoilov uchrashuvda to‘liq 90 daqiqa to‘p surdi. Xitoy super-ligasidagi yana bir vakilimiz - Odil Ahmedov «Shanxay SIPG»ning «Tyanjin Teda» maydonidagi o‘yinida to‘liq vaqt faol to‘p surib, jamoasining minimal hisobdagi yutug‘iga hissa qo‘shdi.
Chempionatda omadsizlik.
