Bugun O‘zbekiston Kubogida 1/8 final dastlabki uchrashuvlari bo‘lib o‘tadi.

Kubokning amaldagi sohibi “Lokomotiv” o‘z uyida “Qizilqum”ga qarshi bahs olib boradi.

Mazkur uchrashuv oldidan “temiryo‘lchilar” jamoasi himoyachisi Muhammad Gnontcha Kone klub matbuot xizmatiga o‘yinoldi fikrlarini bildirib o‘tdi.

– Bizni oson o‘yin kutayotgani yo‘q. Chunki har bir jamoa “Lokomotiv”ga qarshi o‘yinga jiddiy hozirlik ko‘radi. Qolaversa, “Qizilqum” ham yomon jamoa emas. Buni o‘tgan safargi Oliy Liga doirasidagi o‘yinda ko‘rdik. Biroq biz har bir uchrashuvga faqat g‘alaba qozonish uchun chiqamiz. Tayyorgarligimiz ham shunga monand ravishda bo‘ldi.

“Lokomotiv” – Kubokning amaldagi sohibi sanaladi. Jamoamiz bu yil ham o‘tgan safargi muvaffaqiyatni qaytarishga urinadi. Umid qilamanki, men ham “Lokomotiv”ning g‘alabalariga munosib xissamni qo‘shaman, – deydi mahoratli futbolchi.