Boku mezbonlik qilgan «Islom birdamlik o‘yinlari» o‘z yakuniga yetib, unda ishtirok etgan o‘zbekistonlik sportchilar poytaxt Toshkentga qaytib keldi.

Aholisining katta qismini islom diniga e’tiqod qiluvchi kishilar tashkil qiluvchi mamlakatlar o‘rtasidagi Olimpiadada o‘zbekistonlik sportchilar jami 63 ta medalni qo‘lga kiritishga muvaffaq bo‘ldi. Hisob bo‘yicha to‘rtinchi bor o‘tkazilayotgan musobaqada O‘zbekiston ilk bor ishtirok etgandi.

Medallarning 15 tasi oltin bo‘lib, bunda kumushlar soni 17 tani, bronzalar esa 31 tani tashkil qildi. Natijada O‘zbekiston delegasiyasi 54 mamlakat sportchilari ishtirok etgan festivalni 4-o‘rinda yakunladi.

Kuchli uchlik Ozarbayjon, Turkiya va Eronga tegishli bo‘ldi. Markaziy Osiyo mamlakatlari orasida o‘zbekistonlik sportchilar eng yaxshi ko‘rsatkichni qayd etdi.