“Futbol do‘stlik uchun” xalqaro loyihasining o‘zbekistonlik ishtirokchisi FIFA referesi Ravshan Ermatov bilan uchrashdi. Uchrashuv davomida yosh darvozabon – Ilyos Ahmedov “Futbol do‘stlik uchun” loyihasi haqida Ravshan Ermatovga ma’lumot berib o‘tdi. O‘z o‘rnida xalqaro maydonda katta tajribaga ega Ravshan Ermatov esa bolalarga bunday turnirlardagi ishtirok mobaynida nimalarga e’tibor berish haqida o‘z bilganlarini suhbatdoshiga yetkazdi.

Eslatib o‘tamiz, “Futbol do‘stlik uchun” loyihasi bu FIFAning bolalar futboliga bag‘ishlangan keng ko‘lamli loyihasi bo‘lib, bu yildan boshlab unda O‘zbekiston Futbol Federasiyasi ham o‘z vakillari bilan ishtirok etadi. Loyihada bu yil ishtirokchi mamlakatlar soni 64 ta yetganini qo‘shimcha qilish kerak. Xalqaro tashkiliy qo‘mita tomonidan o‘tkazilgan qur’a O‘zbekiston nomidan loyihaning futbol musobaqasida yosh darvozabon ishtirok etishini aniqlab bergach O‘zbekiston Futbol Federasiyasi saralash ishlarini olib bordi. Yakunda saralashdan muvaffaqiyat bilan o‘tgan 12 yoshli darvozabon Ilyos Ahmedov loyiha ishtirokchisiga aylandi.

Ravshan Ermatov bilan uchrashuv so‘nggida yosh futbolchi tajribali hakamning qo‘liga “do‘stlik bilakuzugi”ni taqib qo‘ydi. Bu esa Ravshan Ermatovni ham o‘ziga xos “do‘stlik elchisiga” aylantirdi deyish mumkin. Qayd etish kerak, Ilyos Ahmedov va yurtimizning taniqli insonlari o‘rtasidagi uchrashuvlar davom etadi.