«Sho‘rtan»-«Bunyodkor» jamoalari o‘rtasidagi tomoshabop uchrashuvda qozonilgan g‘alaba(1:0)dan so‘ng, mezbonlar safida o‘zining ajoyib mavsumlaridan birini o‘tkazayotgan, mazmunli o‘yinlari bilan muxlislarda iliq taassurot qoldirayotgan chap qanot hujumkor yarim himoyachisi Otabek Narzullayevni suhbatga tortib, turli mavzudagi savollarimizga javob oldik.
- Otabek, «Sho‘rtan» joriy mavsumni ko‘tarinki ruhda boshladi, o‘yinlar davomida yuqori o‘rinlar uchun kurasha olishini isbotlayapti. Jamoangizning ishonchli ishtirokiga nima sabab bo‘lyapti, deb o‘ylaysiz?
- To‘g‘ri aytasiz, «Sho‘rtan» chindan ham ancha mazmunli o‘yinlar o‘tkazmoqda. Tarkibimizdagi futbolchilarning g‘alabaga bo‘lgan ishtiyoqlari baland. Har bir bahsda faqat uch ochko ilinjida maydonga chiqyapmiz. Ishonchli harakatlarimizning sababi oddiy - biz bir jamoamiz. Klubimiz sha’nini munosib himoya qilishni birinchi galdagi burchim, deb hisoblayman.
- Asosan chap qanot yarim himoyasida harakat qilasiz, qarshi hujumlarda faollikni oshirasiz. Ayniqsa, bunga o‘z maydoninglarda o‘tkazilgan ikki muhim bahs, ya’ni «Lokomotiv» va «Bunyodkor» jamoalariga qarshi kechgan o‘yinlarda guvoh bo‘ldim. Standart vaziyatlarni ijro etish ham sizga ishonib topshirilmoqda. Xususan, «Bunyodkor»ga qarshi kechgan bahsda shunday holatda Umar Eshmurodovning goliga assistentlik qildingiz...
- Darhaqiqat, «Sho‘rtan»ning aksariyat hujumlari qanotlardan uyushtiriladi. Muxlislar hujumkor futbolni xush ko‘rishadi. Murabbiyimiz aytganidek, tezkor o‘yin faollikni talab qiladi. Bizning o‘z uslubimiz, jamoaviy o‘yinimiz bor. qolaversa, taktik jihatdan ham ancha o‘sish kuzatilmoqda.
- O‘yiningiz aql bovar qilmas darajada yaxshilandi. Buni o‘zingiz ham his qilyapsizmi?
- Albatta, sezyapman. Nihoyat, asl o‘yinimni topganga o‘xshayman. Mazkur holat o‘z kuchimga bo‘lgan ishonchning ortishi bilan bog‘liq. Bu narsa har bir futbolchi uchun juda zarur. Chunki ishonch qanchalik yuqori bo‘lsa, hattoki, harakatlaring qovushmagan yoki bir maromni ushlashda qiyinchilikka duch kelgan paytlarda ham o‘z saviyangizni saqlab qolishga imkoniyat tug‘iladi.
- «Bunyodkor»ga qarshi kechgan uchrashuv haqida to‘xtalib o‘tsangiz?
- O‘yin og‘ir o‘tishini avvaldan his qilib turgandik. Raqib jamoa safida yosh va iqtidorli futbolchilar yig‘ilgan. Har ikki klubga g‘alaba juda zarur edi. Shu bois jamoalar maydonga kuchli ishtiyoq bilan tushishdi. Xayriyatki, shiddatli uchrashuvda birgina imkoniyatdan foydalanib, yakunda g‘alabaga erishdik.
