2016/2017 yilgi mavsum Yevropa Chempionlar Ligasi finali bilan o‘z nihoyasiga yetdi. «Yuventus»ga qarshi bahsda «Real» yulduzi Krishtianu Ronaldu porlagan bo‘lsa, musobaqada butun mavsum davomida o‘zini ko‘rsata olgan boshqa futbolchilar ham ko‘p bo‘ldi. E’tiboringizga Goal nashri tomonidan tuzilgan Chempionlar Ligasi ramziy terma jamoasini taqdim etamiz.

Janluiji Buffon («Yuventus») – 39 yoshli darvozabon ko‘pchilik neytral muxlislar tomonidan Krishtianu Ronaldu va Lionel Messining «Oltin to‘p»ga egalik davriga yakun yasovchi futbolchi safatida ko‘rilayotgan edi. Kardifda 4 ta gol o‘tkazib yuborganiga qaramay Buffon bungacha o‘z darvozasidan faqatgina 3 ta gol olib chiqqan edi.

Dani Alvesh («Yuventus») – braziliyalik o‘ng qanot himoyachisi Chempionlar Ligasida vaziyatlar yaratish borasida ikkinchi bo‘ldi, bundan tashqari uchta gol urib, to‘rtta golga assistentlik qildi.

Serxio Ramos («Real») – madridliklar sardori final o‘yinida «Yuventus» futbolchisi Xuan Kuardadoning nohaq chetlatilishiga sabab bo‘lganiga qaramay butun mavsum davomida «Qirollik klubi» markaziy himoyasi qo‘rg‘oniga aylangan va hujumda ham sheriklarini qo‘llab-quvvatlab turgan edi.

Jorjio Kellini («Yuventus») – italiyalik himoyachi finalda o‘zini ko‘rsata olmagan bo‘lishi mumkin, biroq mavsum davomida turinliklar mudofaasiga ulkan hissa qo‘shib keldi. Uning «Barselona»ga qarshi bahslardagi o‘yini alohida e’tiborga sazovor.

Marselo («Real») – chap qanot himoyasida ham braziliyalik futbolchi, faqat u «Real» safida to‘p suradi. Madridliklarning vaziyatlar yaratishda Kroosdan keyingi ikkinchi eng yaxshi futbolchisi bo‘lgan Marselo chap qanotdagi eng zo‘r o‘yinchi maqomini Roberto Karlosdan tortib olishga harakat qilmoqda.

Tiago Alkantara («Bavariya») – ushbu mavsumda o‘z o‘yinini yangi darajaga olib chiqqan ispaniyalik yarim himoyachi ikkita gol va uchta pasga mualliflik qildi, biroq myunxenliklar chorakfinalda to‘xtashga majbur bo‘ldi.

Toni Kroos («Real») – mavsum davomida musobaqada eng ko‘p vaziyat yaratgan germaniyalik futbolchi madridliklarning g‘alabasiga statistikada ko‘rsatilgan bir gol va bir pasdan ko‘ra ancha ko‘p hissa qo‘shdi. U amalga oshirilgan aniq paslar bo‘yicha ham hammani ortda qoldirdi.

Usmon Dembele («Borussiya») – mavsum davomida Chempionlar Ligasida oltita golli pas berib, ikkita gol urgan fransiyalik yosh futbolchi assistentlik borasida faqatgina Neymardan ortda qoldi. Ikkala qanotda ham vinger, hujumchi, hujumkor yarim himoyachi pozisiyalarida o‘ynagan Dembele jamaosi o‘yiniga joziba qo‘shdi.

Neymar («Barselona») – braziliyalik futbolchi «Barselona»ning «PSJ» ustidan erishgan 6:1 hisobidagi tarixiy kambekida asosiy rolni o‘ynagan edi. U musobaqa davomida 4 ta gol urib, 8 ta golga hammualliflik qildi..

Krishtianu Ronaldu («Real») – madridliklarning musobaqadagi haqiqiy qahramoniga aylangan Ronaldu pley-off bosqichida 10 ta gol urib (jami 12 ta), to‘purarlik bahsida Messini ortda qoldirdi. Shuningdek, uning hisobida 5 ta golli pas ham bor.

Lionel Messi («Barselona») – jamoasini chorak finaldan olib o‘tishga yordam berolmagan bo‘lsa ham argentinalik yulduz Chempionlar Ligasida yaxshi mavsum o‘tkazdi – u bergan 38 zarbaning 11 tasi golga aylandi.

Taqqoslash uchun, Ronaldu 12 ta golni urishi uchun 13 o‘yinda 73 ta zarba berishiga to‘g‘ri kelgan. Shuningdek, Messi Ronaldudan bitta kam vaziyat yaratgan.