O‘zbekiston milliy terma jamoasi bugun Toshkentda Tailandga qarshi o‘rtoqlik uchrashuvini o‘tkazadi. Tailandliklar bosh murabbiyi Milovan Rayevas yurtimizga 22 nafar futbolchi bilan tashrif buyurgan. Serbiyalik mutaxassis OCHLning nimchorak finalida ishtirok etgan "Muangtong Yunayted" klubining 9 nafar futbolchisi xizmatidan foydalanmaslikka qaror qildi.

Tailand futbol assosiasiyasi prezidenti Somiot Popumunmuan terma jamoaning navbatdagi o‘yinlarida ijobiy natijalar kutishini ta’kidlab o‘tdi.

"Umid qilaman, barcha futbolchilar Rayevasdan ko‘p narsa o‘rganishadi hamda O‘zbekiston va BAAga qarshi o‘yinlarda ijobiy natija qayd etishadi", — dedi Tailand futboli rahbari.

Bangkokpost.com sayti xabar tarqatishicha, Rayevas Tailand terma jamoasining o‘yin uslubini o‘zgartirishga harakat qilmoqda. U asosiy e’tiborni to‘pni nazorat qilishga va qarshi hujumdan samarali foydalanishga qaratmoqda.

"Jangchi fillar" (Tailand terma jamoasi laqabi) darvozaboni va sardori Sintavichay Xatayrattanakul o‘yindan oldin o‘z fikrlarini bildirib o‘tdi: "Bizda yangi murabbiy va yangi murabbiylar shtabi ish boshladi. Shu bois, barchasini yangidan boshlashimiz lozim. Biz yangidan o‘rganishni boshlashimiz kerak. Jamoa sardori va darvozabon sifatida har qanday raqibga qarshi o‘yinda bor kuchimni berib harakat qilishim lozim. O‘zbekistonga qarshi sifatli o‘rtoqlik o‘yini bo‘ladi. Biz O‘zbekiston kabi kuchli jamoaga qarshi o‘ynash imkoniyatiga ega bo‘lamiz".