Birinchi liga 14-turida «Xorazm» klubi o‘z maydonida peshqadamlardan biri «NBU Osiyo» jamoasini qabul qildi.

Birinchi bo‘lim teng kurashlar ostida o‘tdi. Har ikkala jamoada gol urish uchun imkoniyatlar bo‘ldi, ammo darvozalarni ishg‘ol etish hech bir futbolchiga nasib qilmadi.

Ikkinchi bo‘limni mezbonlar faol boshladi. 49-daqiqada Sardor Matmuratov uzoq masofadan yo‘llangan zarbadan so‘ng, jarima maydoni ichida to‘p yo‘nalishini o‘zgartirib yubordi va hisobni ochdi – 1:0.

Shundan so‘ng toshkentliklar tashabbusni qo‘lga olib, ketma-ket hujum uyushtira boshladi. 63-daqiqada hisob tenglashdi. Sunnatulla Abdullajonov himoyachilarning qo‘pol xatolaridan unumli foydalanib, posbon bilan yuzma-yuz chiqib, to‘pni darvozaga yo‘lladi – 1:1.

Mezbonlarni bu hisob qoniqtirmas edi. Keyingi daqiqalarda tashabbus xorazmliklar qo‘liga o‘tdi. Ammo yaratilgan bir qator xavfli vaziyatlarda darvozabon va himoyachilar yaxshi harakat qilib, o‘z darvozasi dahlsizligini saqlab qolishdi. O‘yin 1:1 hisobidagi durang natija bilan tugadi.

Bu natijadan so‘ng, «Xorazm» 17 ochko jamg‘arib, musobaqa jadvalida 9-o‘rinda bormoqda.
«Xorazm» navbatdagi 2 turni safarda o‘tkazadi va 13 iyun kuni «G‘allaorol», 16 iyun kuni «Zomin» bilan bellashadi, deb xabar bermoqda «Xorazm» FK muxlislarining telegram kanali.

Birinchi liga, 14-tur
Urganch. Olimpiya zaxiralari sport kolleji stadioni, 1506 tomoshabin
«Xorazm» (Urganch) – «NBU-Osiyo» (Toshkent) – 1:1 (0:0)
Gollar: S. Matmuratov (49) – S. Abdullajonov (63).
Hakamlar: R. Abduvaxidov (Qarshi) – 8,1, SH. Kamarov (Samarqand) – 8,0, S. Xakimov (Samarqand) – 8,8, A. Alimov - 9
Inspektor: SH. Egamberdiyev (Qarshi).
Ogohlantirish: O. Nurbayev (45+1), A. Toshpulatov (57) – D. Turanov (89).