Aprel oyida Toshkentning “Paxtakor” jamoasi aksiyalarini milliarder Alisher Usmonov sotib olgani haqida xabar tarqalgandi.

Biroq keyinchalik bu xabar “Paxtakor” rahbariyati tomonidan inkor etilgandi. Ammo jamoada so‘nggi oylarda bo‘layotgan yangiliklar klub hissadorlari orasida yangi figuralarning paydo bo‘lganini ko‘rsatmoqda. Toshkentdagi “Paxtakor” stadioni qayta ta’mirlanishi, to‘la futbolga moslanishi haqidagi xabar ortidan Shota Arveladzening klub bilan ikki yillik shartnoma imzolagani e’lon qilindi. “Paxtakor” jamoasidan Samvel Babayanning ketishining o‘zi katta yangilik va bu holat rahbariyatdagi o‘zgarishlarning yaqqol isboti bo‘la oladi. Shotaning kelishi esa O‘zbek futboliga katta sarmoya kirganini ko‘rsatmoqda. Chunki: 2015 yil yozida Turkiyaning “Trabzonspor” klubi bilan ikki yillik shartnoma imzolagan Shota Arveladzening yillik maoshi 1 million 200 ming yevro etib belgilangandi. O‘tgan yilning yozida esa Isroilning “Makkabi” (Tel-Aviv) jamoasi bilan shartnomaga imzo chekkan Shota bir yilga 800 ming yevro olishi e’lon qilingandi. Endi, o‘ylab ko‘raylik, bizdan ancha kuchli ligalardan talab yetarli bo‘lgan va “Paxtakor”dan ancha kuchli klublarda yiliga eng kamida 1 million dollardan shartnoma imzolagan Shota undan kamiga O‘zbekistonga keladimi? Ortidan navbatdagi savol tug‘iladi: Yiliga murabbiyga shuncha to‘lagan “Paxtakor” mavjud futbolchilari bilan undan natija talab qila oladimi? Demak, navbatda yirik transferlar! Bu ham o‘z navbatida navbatdagi millionlab dollarlarni tashkil etadi. Xo‘sh, bu xarajatlarni amalga oshirayotgan Alisher Usmonovmi? Agar Usmonov bo‘lmasa, o‘zbek futboliga bunday katta sarmoya kiritayotgan kim? “Paxtakor” buni qachon ochiqlab beradi? Futbolimizga biroz oydinlik kiritish davri kelgani ayon bo‘lib qoldi.