27 may kuni o‘z uyida «Bunyodkor»ni qabul qilgan «Navbahor» klubi o‘z tarixida milliy chempionatimiz doirasida 143-durangini qayd etdi.
Namangan klubi durang qayd etish bo‘yicha oliy ligamizda yaqqol rekordchidir. Undan keyingi o‘rinlarda «Andijon» (134ta) va «Paxtakor» (121ta) kelmoqda. Oliy liga tarixida 100 tadan ortiq bahsda durang o‘ynagan jamoalar soni 10ta, xolos. «Chilonzor» va «Vobkent» esa atigi 6tadan bahsda durang o‘ynashgan, xolos. Toshkent va Namangan shahri jamoasi joriy mavsumda (2017) o‘zlarining 50 foiz o‘yinlarida durang qayd etishdi (6 tadan). 143 ta durang 31 ta klub bilan bahslarda qayd etilgan. Umuman olganda, ushbu jamoa oliy ligada 752 ta o‘yin o‘tkazgan bo‘lsa, 357 ta g‘alaba, 143 durang, 252 mag‘lubiyat qayd etgan. To‘plar nisbati: 1289-925. Ushbu klubning duranglari jami o‘yinlarga nisbatan 19,01 foizni tashkil etadi.
Klubga 1974 yilda asos solingan bo‘lib, 1988 yildan buyon «Navbahor» nomi bilan ataladi. Oliy liga tarixida muntazam ishtirok etib keladigan 3 jamoaning («Paxtakor» va «Neftchi» bilan birga) biridir. 1996 yili mamlakat chempioni bo‘lgan. Ushbu klub so‘nggi marta 2004 yilda chempionat sovrindori (3-o‘rin) bo‘lgan. O‘tgan yili turnir jadvalida 15-o‘ringa tushib ketib, «o‘tish o‘yini»da qatnashishiga to‘g‘ri keldi.
Namangan klubi oliy ligada ko‘proq «Neftchi» va «Andijon» bilan kuchlari teng kelgan -13 martadan. Bundan tashqari, ketma-ket uzluksiz 5 mavsum MHSK (1993-1996 yillar, 6 ta o‘yin) va «Qizilqum» (2008-2012 yillar, 7 o‘yin) klublari bilan durang o‘ynagan. Bu «Navbahor»ning eng uzun seriyasidir. Bundan tashqari, «Dinamo» bilan 2011-14 yillarda, ya’ni 4 mavsum durang o‘ynaganini ham eslatib o‘tish o‘rinli. 2008 yilgi mavsum davomida jamoa 11 ta durang o‘ynagan bo‘lsa, 2001 yilda atigi 1 ta durang qayd etilgan. 1-davra yakuniga ko‘ra eng ko‘p durang (6ta) joriy mavsumda qayd etildi. Eslatib o‘tamiz, 2017 yil 1-davrasi yakunlanishiga yana 3 ta tur bor va «Navbahor» so‘nggi 4 turda faqat durang o‘ynayapti.
