Angliya Premyer ligasi shartnomasi muddati tugagani sababli, erkin agentga aylangan futbolchilar ro‘yxatini e’lon qildi.
Unga ko‘ra, «MYU» klubi Zlatan Ibrohimovich bilan yangi shartnoma imzolamadi. «Arsenal» Yaya Sanogo bilan xayrlashdi. Jon Terri «Chelsi»ni tark etadigan bo‘ldi.
«Kristal Pelas» bir yo‘la 11 futbolchining javobini berdi. Ularning orasida Jonatan Benteke (Kristian Bentekening ukasi), Matyo Flamini, Jo Ledli va Freyzer Kempbell bor.
«Manchester Siti» klubining Pablo Sabaleta, Xesus Navas, Villi Kabalyero, Bakari Sanya va Gael Klishi bilan imzolagan shartnomasi muddati tugadi. Alvaro Arbeloa «Vest Hem»ni, Darren Fletcher – «Vest Bromvich»ni tark etadigan bo‘ldi.
Ushbu futbolchilarning barchasi yangi klubga bepul o‘tishlari mumkin.
