O‘zbekiston milliy terma jamoasi ertaga Eronga qarshi JCH-2018 saralash bahsini o‘tkazadi. Uchrashuvdan oldin Eron terma jamoasining sobiq sardori Ahmadrizo Obidzoda o‘z fikrlarini bildirib o‘tdi.

"Eron ushbu saralash bosqichini juda yaxshi o‘tkazmoqda va biz raqiblarga nisbatan yaxshi harakat qilyapmiz. Baxtimizga, Keyrush Osiyo futbolini yaxshi biladi va u har bir o‘yinga maxsus reja tanlay olyapti. Albatta, O‘zbekistonga qarshi o‘yinda ham u o‘z rejasiga ega bo‘lishi kerak.

Futbolchilar o‘yindan oldin O‘zbekistonni mag‘lub etib bo‘ldik deb o‘ylamasliklari kerak. Uchrashuv og‘ir bo‘ladi. Futbolda oldindan hech narsa deb bo‘lmasligini barchamiz bilamiz. O‘zbekistonga qarshi o‘yinda 90 daqiqalik jangga tayyor bo‘lishimiz kerak. Bu bahsda terma jamoamiz g‘alaba qozonib, Jahon chempionati yo‘llanmasini qo‘lga kiritishini tilayman.

Ishonchim komil, "Ozodiy"ga ko‘plab muxlislar tashrif buyurishadi. Ishqibozlar milliy terma jamoani qizg‘in qo‘llab-quvvatlashlari kerak. Agar o‘yindan oldin stadion muxlislar bilan to‘lsa, biz jahon chempionati sari jiddiy qadam tashlagan bo‘lamiz", — dedi Obidzoda.