Eron terma jamoasi bosh murabbiyi Karlos Keyrush O‘zbekistonga qarshi o‘yindan oldin o‘z fikrlarini bildirib, muxlislarni "Ozodiy" stadioniga chorladi.

"O‘zbekiston — kuchli terma jamoa. Muxlislarimiz 12-o‘yinchi bo‘lishini istardim. O‘zimiz istagan rejani amalga oshirish uchun 90 daqiqa davomida konsentrasiyani yo‘qotmasligimiz va yaxshi o‘yin ko‘rsatishimiz kerak. Milliy terma jamoa ham hujumda, ham himoyada yaxshi o‘yin ko‘rsatishi lozim", — dedi Keyrush o‘yin oldi matbuot anjumanida.

"O‘zbekistonga qarshi o‘yinda bizning eng yaxshi o‘yinchimiz — muxlislarimiz. Jamoa ularning qo‘llab-quvvatlashiga muhtoj. Ular bilan birgalikda bizning ishimiz oson bo‘ladi".

"Futbolda mashaqqatli mehnatsiz hech narsaga erishib bo‘lmaydi. Biz uchun bu o‘yin Jahon chempionati finaliga teng bo‘ladi. Ishonchim komil, dushanba kuni o‘zimizga kerakli natijaga erishamiz".

"Eron hali JCH yo‘llanmasini qo‘lga kiritmadi. Ertangi o‘yindan keyin bu haqda gapirish mumkin. O‘zbekistonda guruhni birinchi yoki ikkinchi o‘rinda yakunlamoqchi. Buni bilamiz. O‘zbekistonga qarshi o‘yin — saralash bosqichidagi bizning eng qiyin o‘yinimiz bo‘ladi", — deya o‘z so‘zini yakunladi Keyrush.