Eron milliy terma jamoasining himoyachisi Pejman Montazariy O‘zbekiston terma jamoasiga qarshi uchrashuv Rossiya o‘tadigan jahon chempionati yo‘lida eng qiyin o‘yinlardan biri bo‘lishini aytdi.

"A" guruhida uchinchi o‘rinda borayotgan O‘zbekiston dushanba kuni Tehronning "Ozodiy" stadionida guruh peshqadami Eron bilan o‘ynaydi.

"Bu uchrashuv biz uchun eng qiyin o‘yin bo‘lishini bilamiz, - deydi Toshkentda 1:0 hisobida g‘alaba qozonib qaytgan terma jamoa futbolchisi Pejman Muntazariy. - Biz ularni juda yaxshi bilamiz, ikki hafta davomida ularning o‘yinlarini tahlil qildik. Shuning uchun qattiq o‘yin bo‘lishini bilamiz, ammo yaxshi natijaga erishishga umid qilamiz.

Oxirgi to‘rt-besh yilda qattiq mehnat qildik, bir qator yosh o‘yinchilarni safimizga qo‘shdik, bugungi kunda ular yetildilar va endi maqsadimizga yetamiz, deb o‘ylayman.

Jamoamiz o‘yinga tayyor, himoyamiz kuchli va jipslashib o‘ynaydi. To‘rt-besh yil avval qilgan maqsadlarimizga erishdik, deb o‘ylayman.

O‘tgan jahon chempionatidan yaxshi xotiralar qolgan va muxlislarimiz bizlardan mamnun bo‘lgan. Endigi jahon chempionatida muxlislarimiz bizdan guruh bosqichidan chiqishni kutadilar. Shuning uchun JCH final qismining ikkinchi bosqichi bizning asosiy maqsadimiz bo‘lishi kerak.

Ammo bu haqida gapirishga biroz erta, chunki hali mundialga yo‘l olganimiz yo‘q. Oldimizda oxirgi 7-8 yildagi eng muhim o‘yinlardan biri turibdi".