Эрон миллий терма жамоасининг ҳимоячиси Пежман Монтазарий Ўзбекистон терма жамоасига қарши учрашув Россия ўтадиган жаҳон чемпионати йўлида энг қийин ўйинлардан бири бўлишини айтди.

"А" гуруҳида учинчи ўринда бораётган Ўзбекистон душанба куни Теҳроннинг "Озодий" стадионида гуруҳ пешқадами Эрон билан ўйнайди.

"Бу учрашув биз учун энг қийин ўйин бўлишини биламиз, - дейди Тошкентда 1:0 ҳисобида ғалаба қозониб қайтган терма жамоа футболчиси Пежман Мунтазарий. - Биз уларни жуда яхши биламиз, икки ҳафта давомида уларнинг ўйинларини таҳлил қилдик. Шунинг учун қаттиқ ўйин бўлишини биламиз, аммо яхши натижага эришишга умид қиламиз.

Охирги тўрт-беш йилда қаттиқ меҳнат қилдик, бир қатор ёш ўйинчиларни сафимизга қўшдик, бугунги кунда улар етилдилар ва энди мақсадимизга етамиз, деб ўйлайман.

Жамоамиз ўйинга тайёр, ҳимоямиз кучли ва жипслашиб ўйнайди. Тўрт-беш йил аввал қилган мақсадларимизга эришдик, деб ўйлайман.

Ўтган жаҳон чемпионатидан яхши хотиралар қолган ва мухлисларимиз бизлардан мамнун бўлган. Эндиги жаҳон чемпионатида мухлисларимиз биздан гуруҳ босқичидан чиқишни кутадилар. Шунинг учун ЖЧ финал қисмининг иккинчи босқичи бизнинг асосий мақсадимиз бўлиши керак.

Аммо бу ҳақида гапиришга бироз эрта, чунки ҳали мундиалга йўл олганимиз йўқ. Олдимизда охирги 7-8 йилдаги энг муҳим ўйинлардан бири турибди".