2018 yili Rossiyada bo‘lib o‘tadigan jahon chempionati yo‘llanmasi uchun Osiyo qit’asining "A" guruhida yana bir o‘yin bo‘lib o‘tdi. Guruhda 3-o‘rin orqali JCHga chiqish uchun kurash olib borayotgan Suriya va Xitoy terma jamoalari Malayziyada to‘qnash kelishdi. O‘zbekiston terma jamoasi kecha yutqazib qo‘yganidan keyin har ikkala jamoa faqat g‘alaba uchun maydonga tushishdi.
Birinchi bo‘limda suriyaliklar yaxshi o‘yin namoyish etishdi va 12-daqiqada Mahmud al-Mavas tomonidan penaltidan urilgan gol evaziga hisobni ochishdi. Ikkinchi bo‘limda Xitoy vaziyatni o‘zgartirishga muvaffaq bo‘ldi. Dastlab Gao Lin penaltidan muvozanatni tiklagan bo‘lsa, oradan ko‘p o‘tmasdan Vu Si chinliklarni oldinga olib chiqdi. Uchrashuvga qo‘shib berilgan daqiqalarda Ahmad as-Solih jarimadan chiroyli gol urib, hisobni tenglashtirdi.
Mazkur durang orqali har ikkala jamoa 2 ochkodan mahrum bo‘lishdi. Xitoy 3-o‘rin uchun kurash imkoniyatini juda ham pasaytirib yuborgan bo‘lsa, Suriya O‘zbekistonga yaqinlashib olish imkoniyatidan foydalana olmadi.
JCH-2018. Osiyo. "A" guruhi, 8-tur
SURIYA - XITOY 2:2
Gollar: Mahmud al-Mavas (12-pen.), Ahmad as-Solih (90+3) — Gao Lin (69-pen.), Vu Si (75)
| № | Jamoa | O‘yin | G‘alaba | Durang | Mag‘lubiyat | T-N | Ochko |
|---|---|---|---|---|---|---|---|
| 1 | Eron | 8 | 6 | 2 | 0 | 8-0 | 20 |
| 2 | Janubiy Koreya | 7 | 4 | 1 | 2 | 9-7 | 13 |
| 3 | O‘zbekiston | 8 | 4 | 0 | 4 | 6-6 | 12 |
| 4 | Suriya | 8 | 2 | 3 | 3 | 4-5 | 9 |
| 5 | Xitoy | 8 | 1 | 3 | 4 | 5-9 | 6 |
| 6 | Qatar | 7 | 1 | 1 | 5 | 3-8 | 4 |
