2018 йили Россияда бўлиб ўтадиган жаҳон чемпионати йўлланмаси учун Осиё қитъасининг "А" гуруҳида яна бир ўйин бўлиб ўтди. Гуруҳда 3-ўрин орқали ЖЧга чиқиш учун кураш олиб бораётган Сурия ва Хитой терма жамоалари Малайзияда тўқнаш келишди. Ўзбекистон терма жамоаси кеча ютқазиб қўйганидан кейин ҳар иккала жамоа фақат ғалаба учун майдонга тушишди.
Биринчи бўлимда сурияликлар яхши ўйин намойиш этишди ва 12-дақиқада Маҳмуд ал-Мавас томонидан пенальтидан урилган гол эвазига ҳисобни очишди. Иккинчи бўлимда Хитой вазиятни ўзгартиришга муваффақ бўлди. Дастлаб Гао Лин пенальтидан мувозанатни тиклаган бўлса, орадан кўп ўтмасдан Ву Си чинликларни олдинга олиб чиқди. Учрашувга қўшиб берилган дақиқаларда Аҳмад ас-Солиҳ жаримадан чиройли гол уриб, ҳисобни тенглаштирди.
Мазкур дуранг орқали ҳар иккала жамоа 2 очкодан маҳрум бўлишди. Хитой 3-ўрин учун кураш имкониятини жуда ҳам пасайтириб юборган бўлса, Сурия Ўзбекистонга яқинлашиб олиш имкониятидан фойдалана олмади.
ЖЧ-2018. Осиё. "А" гуруҳи, 8-тур
СУРИЯ - ХИТОЙ 2:2
Голлар: Маҳмуд ал-Мавас (12-пен.), Аҳмад ас-Солиҳ (90+3) — Гао Лин (69-пен.), Ву Си (75)
| № | Жамоа | Ўйин | Ғалаба | Дуранг | Мағлубият | Т-Н | Очко |
|---|---|---|---|---|---|---|---|
| 1 | Эрон | 8 | 6 | 2 | 0 | 8-0 | 20 |
| 2 | Жанубий Корея | 7 | 4 | 1 | 2 | 9-7 | 13 |
| 3 | Ўзбекистон | 8 | 4 | 0 | 4 | 6-6 | 12 |
| 4 | Сурия | 8 | 2 | 3 | 3 | 4-5 | 9 |
| 5 | Хитой | 8 | 1 | 3 | 4 | 5-9 | 6 |
| 6 | Қатар | 7 | 1 | 1 | 5 | 3-8 | 4 |
