Konfederasiyalar kubogini yoritish uchun Moskvaga kelgan jurnalistni chuv tushirib ketgan taksi haydovchisi qo‘lga olindi.
Ma’lumki, 17 iyun kuni Rossiyada Konfederasiyalar kubogi start oladi. Musobaqani yoritish
uchun dunyoning turli burchaklaridan jurnalist va muxbirlar yetib kelmoqda.
Xususan, Radio Chili xodimi Diyego Gaspar Miranda ham Moskva shahriga yetib keldi. Biroq jurnalist kelgan zahotiyoq noxush voqea ishtirokchisiga aylandi. U «Domodedovo» aeroportida taksiga o‘tirib, Moskva markazidagi mehmonxonaga yetib kelgan. Haydovchi esa undan 50 ming rubl (taxminan 800 AQSH dollari) talab qilgan. Narxlar haqida tasavvurga ega bo‘lmagan mehmon pulni taksichiga berib yuborgan. Ammo keyinchalik u aeroportdan Moskva markaziga yetib kelish bor yo‘g‘i 3 ming rubl ekanini bilib qolgan.
Shundan so‘ng, Miranda polisiyaga murojaat qilishga majbur bo‘lgan. Polisiya esa qisqa fursatda firibgarni qo‘lga olgan. U Moskva viloyatida yashovchi fuqaro bo‘lib chiqqan. Ayni vaqtda gumonlanuvchi polisiya bo‘limida ushbu holat yuzasidan ko‘rsatma bermoqda. Unga nisbatan "Firibgarlik" moddasi bo‘yicha jinoiy ish qo‘zg‘atilgan.
