Конфедерациялар кубогини ёритиш учун Москвага келган журналистни чув тушириб кетган такси ҳайдовчиси қўлга олинди.
Маълумки, 17 июнь куни Россияда Конфедерациялар кубоги старт олади. Мусобақани ёритиш
учун дунёнинг турли бурчакларидан журналист ва мухбирлар етиб келмоқда.
Хусусан, Radio Chili ходими Диего Гаспар Миранда ҳам Москва шаҳрига етиб келди. Бироқ журналист келган заҳотиёқ нохуш воқеа иштирокчисига айланди. У «Домодедово» аэропортида таксига ўтириб, Москва марказидаги меҳмонхонага етиб келган. Ҳайдовчи эса ундан 50 минг рубл (тахминан 800 АҚШ доллари) талаб қилган. Нархлар ҳақида тасаввурга эга бўлмаган меҳмон пулни таксичига бериб юборган. Аммо кейинчалик у аэропортдан Москва марказига етиб келиш бор йўғи 3 минг рубл эканини билиб қолган.
Шундан сўнг, Миранда полицияга мурожаат қилишга мажбур бўлган. Полиция эса қисқа фурсатда фирибгарни қўлга олган. У Москва вилоятида яшовчи фуқаро бўлиб чиққан. Айни вақтда гумонланувчи полиция бўлимида ушбу ҳолат юзасидан кўрсатма бермоқда. Унга нисбатан "Фирибгарлик" моддаси бўйича жиноий иш қўзғатилган.
