Rossiya premyer-ligasining so‘nggi mavsumida 3 nafar futbolimiz maydonga tushdi. Ammo Odil Ahmedov («Krasnodar») mavsumning birinchi qismi tugagach, Xitoyga yo‘l olib, «Shanxay SIPG» a’zosiga aylandi. Milliy jamoamizning yana ikki nafar vakili Vitaliy Denisov («Lokomotiv», Moskva) va Vadim Afonin («Orenburg») esa mavsum oxiriga qadar premyer-ligada qolishdi. Yakunda Denisovning jamoasi 8-o‘rinni egallagan bo‘lsa, «Orenburg» o‘tish o‘yinlarida ishtirok etish qismatiga duchor bo‘lib, yana birinchi divizionga tushib ketdi. Xo‘sh, ikki legionerimizning mavsum davomidagi shaxsiy statistikasi qanday ko‘rinish oldi? Umumiy natijalar Denisovda yaxshiroqmi yoki Afoninda? Javob qaydayligiga qiziqsangiz, marhamat, the-uff.com sayti to‘plagan ma’lumotlar asosida ikki futbolchimizning ko‘rsatkichlarini o‘zaro taqqoslab ko‘rishingiz mumkin.
VADIM AFONIN
* Vadim mavsum davomida 29ta o‘yinda ishtirok etdi;
* Shundan 26ta o‘yin Rossiya premyer-ligasi, 2tasi mamlakat kubogi va yana biri ligada qolish uchun «pley-off» raundida o‘tkazildi;
* Afonin 25ta o‘yinni jamoasining boshlang‘ich tarkibida boshlab, ularning 24tasida to‘liq 90 daqiqadan harakatlandi;
* Taqqoslash uchun aytsak, «Orenburg»ning boshqa biror yarim himoyachisi chempionatda hamyurtimizchalik ko‘p o‘ynagani yo‘q;
* Vadim o‘yin davomida atigi bir marta almashtirildi. Ya’ni faqat «Lokomotiv»ga qarshi kechgan uchrashuvning 58-daqiqasida o‘z o‘rnini zaxira vakiliga bo‘shatib berdi;
* Umumiy hisobda aytsak, Afonin Rossiya chempionati o‘yinlarida jami 2307 daqiqa to‘p surdi;
* Hamyurtimiz premyer-liganing 29-turida chempionatdagi birinchi va yagona golini nishonladi;
* Afonin mavsum davomida 8 marta ogohlantirildi va sariq kartochkalar limiti sabab, bitta o‘yinni o‘tkazib yubordi;
* «Orenburg» finishga 13-o‘rinda yetib kelib, «pley-off» bosqichida SKA jamoasiga qarshi maydonga tushdi;
* 2ta o‘tish o‘yinida ham hisob ochilmadi va penaltilar seriyasiga murojaat etildi. Biroq bunda Afonin jamoasiga omad yetishmadi va u elitadagi bir yillik ishtirokdan so‘ng birinchi divizionga tushib ketdi.
VITALIY DENISOV
* Vitaliy Denisov premyer-liga doirasidagi 24ta o‘yinda ishtirok etdi;
* Hamyurtimiz mavsum davomida chempionat taqvimidagi 2ta o‘yindagina zaxirada qoldirildi, shuningdek, 3ta uchrashuvda rasmiy qaydnomaga kiritilmadi;
* Vitaliy shuningdek, yana 1ta o‘yinni jarohat sabab, o‘tkazib yubordi;
* Terma jamoamiz himoyachisi chempionat bahslarida 5 marta sariq kartochka oldi;
* Hamyurtimiz klubining Rossiya kubogi doirasidagi 4ta o‘yinida ham ishtirok etdi;
* Vitya kubok bahslarida bir bora ogohlantirildi;
* Mavsum davomida «Lokomotiv» tarkibidagi legionerlardan birgina Nemanya Peychinovich (Serbiya) Denisovdan ko‘proq maydonga tushdi - 27 marta;
* Umumiy hisobda aytsak, Vitaliy mavsum davomida barcha musobaqalar hisobidan maydonda 2893 daqiqa to‘p surdi;
* Mavsum hamyurtimiz uchun Rossiya kubogi qo‘lga kiritilgani bilan esda qoladigan bo‘ldi.
