O‘zining fast fudlari bilan jahonga mashhur bo‘lgan McDonald’s kompaniyasi Xalqaro olimpiya qo‘mitasi bilan hamkorlikni to‘xtatdi, deb ma’lumot berdi Insidethgames nashri.

Tomonlar 1976 yildan buyon o‘zaro hamkorlik qilib kelayotgandi. 2012 yil McDonald’s XOQ bilan yana sakkiz yillik shartnoma imzolashni ma’qul ko‘rgandi. Biroq bu amalda o‘z yakuniga yetmaydi. Har ikki tomon o‘zaro kelishib, shartnomani 2018 yilda yakunlaydigan bo‘ldi.

2012 yil tuzilgan shartnomada McDonald’s XOQni 100 million dollarga ko‘ndirgandi.

Rejaga ko‘ra, McDonald’s Pxenchan—2018 o‘yinlarida so‘nggi bor olimpiya shaharchasini o‘zining mahsulotlari bilan ta’minlaydi va sportchilarga oziq-ovqat mahsulotlari yetkazib beradi.

Endilikda XOQ Tokio—2020 Olimpiadasiga qadar bu borada yangi ko‘makchilar topishi kerak bo‘ladi.