Kiprning “AYEL” va Bolgariyaning “Botev” jamoalari o‘rtasidagi o‘rtoqlik uchrashuvini maydonda paydo bo‘lgan buqa va kuchuk to‘xtatdi.
Buqa maydonni bamaylixotir kesib o‘tib, stadionni o‘rab turgan himoya to‘rining tagidan ketishga uringan. Uning orqasidan esa it ham kelib, shoxli jonivorning harakatlarini kuzata boshlagan. Hoynahoy, buqa maydondagi chimning mazasini tatib ko‘rmoqchi bo‘lgan.
Tez orada stadionga butun gala yaqinlasha boshladi va yana bir buqa to‘siqdan o‘tishga harakat qildi. O‘yinchilar esa unga ichimlik idishlarini uloqtirishdi.
Oxir-oqibat to‘rt oyoqli “muxlislar”ni maydondan quvishga muvaffaq bo‘lishgan va o‘yin davom etgan.
