«An-Nasr» Saudiya Arabistoni chempionatidagi muvaffaqiyatli yurishini davom ettirib, ketma-ket ikkinchi uchrashuvda yirik hisobda zafar quchdi.

Ange Postekoglu jamoasi 2-turda safarda «Ar-Riyod» bilan to‘qnash kelib, raqib darvozasiga javobsiz to‘rtta gol urdi — 4:0.

Mehmonlarning gollarini Abdulloh Al-Amri, Anjelu Gabriel, Joau Feliks va Krishtianu Ronaldu o‘z hisobiga yozdirib qo‘ydi. Ikkinchi bo‘limda zaxiradan maydonga tushgan 41 yoshli Ronaldu 83-daqiqada yakuniy hisobni o‘rnatdi.

Shu tariqa, portugaliyalik yulduz yangi mavsumdagi ilk rasmiy uchrashuvidayoq gol urishga muvaffaq bo‘ldi.

«An-Nasr» mavsumni ikki ishonchli g‘alaba bilan boshladi. Jamoa dastlabki turda «Al-Fath»ni 3:0 hisobida mag‘lub etgan bo‘lsa, endi «Ar-Riyod» darvozasiga to‘rtta javobsiz to‘p kiritdi.

Natijada Postekoglu shogirdlari dastlabki ikki uchrashuvda 7 ta gol urib, o‘z darvozasidan hali birorta ham to‘p o‘tkazib yuborgani yo‘q.