Oliy liganing 15-turidan o‘rin olgan “Neftchi” – “Metallurg” (0:2) o‘yinidan keyin, mehmonlar jamoasi boshlig‘i Shavkat Saidov o‘yin haqidagi fikrlari bilan o‘rtoqlashdi.

«Ajoyib o‘yin guvohi bo‘ldik. Ikkinchi goldan so‘ng himoyaga e’tibor qaratdik. Mavsumni omadsiz boshlagandik, hozir esa ketma-ket to‘rtinchi o‘yinda g‘olib chiqdik. «Metallurg» o‘zini ancha o‘nglab oldi. Bugun raqibdan ancha ustunlik qildik. Biz mavsum boshida oqsagandik, hozir shunday vaziyat "Neftchi"da bo‘layapti deb o‘ylayman. Ikkinchi davrada Farg‘ona klubi bunday vaziyatdan chiqib ketishiga tilakdoshman.

Zohid Abdullayev uch yoki to‘rtta gol urishi mumkin edi. Hujumchimizda deyarli har bir o‘yinda kamida ikkita yuz foizli vaziyatlar bo‘ladi. So‘nggi vaqtlarda o‘zini ko‘rsatmoqda. Bugunga kelib gollari soni 5taga yetdi. Ikkinchi davrada yanada ko‘proq gol kutamiz.

Bugungi o‘yinda "Neftchi"ni taniy olmay qoldim. Bu jamoa katta tarixga ega bir necha bor chempion bo‘lgan. Farg‘onadan uncha muncha jamoalar ochko olib keta olmasdi. Vadim Abramovga biroz vaqt kerak. Bunday vaziyatdan olib chiqib ketishiga ishonaman», - dedi Shavkat Saidov.