Chili terma jamoasi yarim himoyachisi Arturo Vidal Konfederasiyalar kubogi yarim final bahsidan keyin o‘z fikrlarini bildirib o‘tdi. Eslatib o‘tamiz, penaltilar seriyasida chililik posbon Klaudio Bravo raqib tomonidan yo‘llangan 3ta zarbaning barchasini qaytarishga muvaffaq bo‘ldi.

«Klaudio – jahonning eng yaxshi darvozabonlaridan biri. Penaltilar seriyasi boshlanishidan avval u raqibning 2-3ta zarbasini qaytarishini aytgandi va u buni uddaladi. U aqlbovar qilmas ishni amalga oshirdi.

Konefederasiyalar kubogida chempion bo‘lish orzusini amalga oshirish uchun kurashda davom etayotganimizdan xursandmiz. Qiyin vaziyatlarda yaxshi o‘ynay olishimizni, birdamlik va jonfidolik namoyish qilishimizni isbotladik.  Bu chilicha matonat.

Endi dam olishimiz kerak va finaldagi raqibni kutamiz. Meksika va Germaniya – murakkab raqiblar. Orzuni ro‘yobga chiqarish uchun yaxshi o‘yin ko‘rsatishimiz kerak.

Chilini jahon reytingida birinchi o‘ringa olib chiqishni istaymiz. Biz finalga chiqdik va chempion bo‘lishni istaymiz. Mamlakat futbol tarixida o‘z izimizni qoldirishni istaymiz.

O‘z mamlakatim uchun hayotimni ham berishga tayyorman. Ambisiyamiz yuqori. Chempion bo‘lishni, kelasi yilda esa jahon chempionatida ishtirok etish uchun Rossiyaga qaytishni istaymiz», – dedi Vidal.