Чили терма жамоаси ярим ҳимоячиси Артуро Видаль Конфедерациялар кубоги ярим финал баҳсидан кейин ўз фикрларини билдириб ўтди. Эслатиб ўтамиз, пенальтилар сериясида чилилик посбон Клаудио Браво рақиб томонидан йўлланган 3та зарбанинг барчасини қайтаришга муваффақ бўлди.

«Клаудио – жаҳоннинг энг яхши дарвозабонларидан бири. Пенальтилар серияси бошланишидан аввал у рақибнинг 2-3та зарбасини қайтаришини айтганди ва у буни уддалади. У ақлбовар қилмас ишни амалга оширди.

Конефедерациялар кубогида чемпион бўлиш орзусини амалга ошириш учун курашда давом этаётганимиздан хурсандмиз. Қийин вазиятларда яхши ўйнай олишимизни, бирдамлик ва жонфидолик намойиш қилишимизни исботладик.  Бу чилича матонат.

Энди дам олишимиз керак ва финалдаги рақибни кутамиз. Мексика ва Германия – мураккаб рақиблар. Орзуни рўёбга чиқариш учун яхши ўйин кўрсатишимиз керак.

Чилини жаҳон рейтингида биринчи ўринга олиб чиқишни истаймиз. Биз финалга чиқдик ва чемпион бўлишни истаймиз. Мамлакат футбол тарихида ўз изимизни қолдиришни истаймиз.

Ўз мамлакатим учун ҳаётимни ҳам беришга тайёрман. Амбициямиз юқори. Чемпион бўлишни, келаси йилда эса жаҳон чемпионатида иштирок этиш учун Россияга қайтишни истаймиз», – деди Видаль.