Toshkentning “Lokomotiv” klubi Oliy Liga 2017 yilgi mavsumi birinchi davra o‘yinlarini yakunladi.

Ta’kidlash joizki, 15 ta uchrashuvdan so‘ng “Lokomotiv” 11 ta g‘alaba, 2 ta durang hamda 2 ta mag‘lubiyat qayd etgan holda 35 ochko jamg‘arib, musobaqa jadvalida yakka peshqadam bo‘lib turibdi. Jamoamiz 36 bor raqiblar darvozasini ishg‘ol etishga muvaffaq bo‘ldi. O‘z darvozamizdan esa 10 martagina to‘p o‘tkazib yubordik. Bu esa Oliy Ligadagi ayni paytda eng yaxshi natija bo‘lib turibdi. Ya’ni gol urish bobida ham, eng kam gol o‘tkazib yuborish borasida ham “Lokomotiv” yetakchilikni qo‘lga olgan.

“Loko” faqatgina “Sho‘rtan” hamda “Bunyodkor”ga qarshi uchrashuvlarda raqib darvozasiga gol kirita olmadi. Jamoamizning eng yirik hisobdagi g‘alabasi esa “Obod” ustidan 8-tur o‘yinlari doirasida qo‘lga kiritildi. Gollarga boy tarzda kechgan o‘sha bellashuvda amaldagi chempionlar “Obod” darvozasiga javobsiz 7 ta gol kiritishga muvaffaq bo‘lishdi.

Marat Bikmayevning Oliy Liga to‘purarlar ro‘yxatida 13 ta gol bilan yakka peshqadamlik qilayotganini ta’kidlash joiz. U 13 ta golning 4 tasini penaltidan kiritgan.

Jaloliddin Masharipov esa 5 ta gol (1 ta penaltidan) kiritib, jamoamizning ikkinchi to‘purari bo‘lib turibdi. Undan keyingi o‘rinda Murod Bobojonov 4 ta gol bilan bormoqda.

Temur Kapadze, Ikrom Aliboyev hamda Sardor Mirzayev 3 martadan raqib darvozasini ishg‘ol etishgan. Islom To‘xtaho‘jayev, Diyor Turopov, Kaxi Maxaradze, Salamat Qutiboyev va Azizbek Amonov bir martadan to‘p kiritishga erishdi.