Joriy yilgi mavsum birinchi davra yakunlariga ko‘ra “Navbahor”ni to‘qqiz nafar futbolchi tark etganligi haqida xabar bergandik. O‘z navbatida bosh murabbiy Ilhom Mo‘minjonovni ketganlar o‘rnini munosib futbolchilar bilan to‘ldirish maqsadida boshqa o‘yinchilar bilan muzokaralarga kirishganligi haqida ham ma’lum qilgandik. Bundan biroz vaqt oldin ikki nafar futbolchini ikkinchi davrani “Navbahor”da o‘tkazishi ma’lum bo‘ldi. Bu yilgi chempionat birinchi qismida Farg‘onaning “Neftchi” sharafini himoya qilgan yarim himoyachi Abbos Maxstaliyev va “Olmaliq” tarkibida to‘p surgan hujumchi Doniyor Usmonov shular jumlasidandir.

Abbos Maxstaliyev muxlislarimizga yaxshi tanish ekanligini aytib o‘tish joiz. Mamlakatimiz o‘smirlar va yoshlar terma jamoalarida munosib ishtirok orqali ko‘pchilik ishqibozlar Abbosni yaxshi bilishadi. Birinchi davrani “Neftchi”da o‘tkazgan 23 yoshli yarim himoyachi 14 ta uchrashuvda maydonga tushganligini qo‘shimcha qilish joiz. 1994 yilning 6 iyul sanasida tug‘ilgan Doniyor Usmonov birinchi davrani “Olmaliq” tarkibida o‘tkazdi. Ushbu hujumchi asosan zaxirada qoldirilganligi sababli atigi uchta uchrashuvda maydonga tusha oldi xolos. Usmonov o‘zining tezkorligi bilan 2015 yilgi mavsumda “Qo‘qon-1912” jamoasida o‘zini ko‘rsatgandi. Shundan so‘ng Toshkentning “Lokomotiv” klubi safiga qo‘shilgandi. 2016 yilgi mavsum birinchi yarmini “Loko”da o‘tkazgan futbolchini ikkinchi davrada “Olmaliq” jamoasiga ijara berilgandi.

Har ikki futbolchi ham bosh murabbiy Ilhom Mo‘minjonov bilan bugun bo‘lib o‘tgan suhbat chog‘ida “Navbahor” jamoasiga o‘tishga rozi ekanliklari bildirishgan. Tez orada ushbu o‘yinchilar bilan shartnoma imzolanadi. Shuningdek, muzokaraga kirishilgan boshqa futbolchilarni ham tez orada “Navbahor” a’zosiga aylanishlari kutilmoqda. Kelishuvga erishilgach, jamoamiz a’zosiga aylangan futbolchilar haqida xabar beramiz.