Andijonliklar davralar oralig‘ida yuzaga kelgan ma’lum muddatlik tanaffusdan so‘ng biroz xordiq chiqargan xolda, 8 iyuldan tayyorgarlikni boshlab yubordi.

Kecha jamoa a’zolari tushlikdan so‘ng, klub qarorgohida yig‘ildi va kechki payt Bo‘ston dahasidagi «BO‘FM» maydonida tiklanish mashg‘ulotlarini olib bordi.

Tarkibda hozircha jiddiy o‘zgarishlar yo‘q. Lekin murabbiylar shtabi raqobatni yanada kuchaytirishga alohida e’tibor qaratmoqda. Rejaga ko‘ra, dastlabki bosqich o‘quv-yig‘in mashg‘ulotlari Andijonda o‘tadi. Futbolchilar bugundan ikki mahaldan shug‘ullana boshladi.

Birinchi davrani jamoada o‘tkazgan darvozabon Lochin Dolimov va yarim himoyachi Sanjar Asqaraliyev bilan do‘stona ravishda xayrlashildi. Ularning kelgusi faoliyatiga omad tilab qolamiz. Hozircha tarkibda asosan mahalliy futbolchilar ekanligini qo‘shimcha qilish lozim. Asli andijonlik bo‘lgan darvozabon Davron Jo‘raqulov va himoyachi Tursunboy Husanov ham ayni damda jamoa yig‘inida bo‘lib turibdi. Shuningdek ulardan tashqari yana bir qator yoshlar ko‘rikdan o‘tish uchun taklif etilgan.