Ispaniyalik yarimhimoyachi Alvaro Arbeloa futbolchilik faoliyatini yakunlashga qaror qildi. O‘tgan mavsumni «Vest Hem»da o‘tkazgan futbolchi ketish sabablarini Marca nashriga bergan intervyusida gapirib o‘tdi.
- Qiyin kechgan «Vest Xem»dagi mavsumdan so‘ng ta’tilda hordiq chiqaryapsizmi?
- Haqiqatan ham mavsum qiyin kechdi. Hozir bu haqda o‘ylashni ham istamayapman. Lekin nafaqat professional, balki shaxsiy jihatdan ham qiyin bo‘ldi.
- Kelajak rejalaringiz qanday?
- Xayrlashish vaqti keldi. Faoliyatimni yakunlab, butsalarimni mixga ilishga qaror qildim. Ko‘pchilik qo‘llab-quvvatlayapti. Shu bilan birga faoliyatimni davom ettirishimni istashmoqda. Jismonan bunga qodirman. Lekin ruhan... Futbol men uchun haftalik kurash, musobaqa. Shu bois ham Xitoy yoki AQSHda davom ettirish niyatim yo‘q. Har kuni bor kuchim bilan mashg‘ulot o‘tkazardim. Dam olish kunlari do‘stlarimga qo‘ng‘iroq qilib, yana bitta mashq o‘tkazishni taklif qilardim. Endi «stop» deyish vaqti keldi. Ayni payt menga bo‘layotgan takliflarni tushunchamda futbol hisoblamayman.
- «Vest Xem»da o‘tkazgan mavsumingiz faoliyatingizni yakunlashingizga sabab bo‘ldimi?
- Hamisha oyoqlarim quvvatdan qolguncha o‘ynayman, deb o‘ylardim. Lekin oxir-oqibat ruhiy holatim va motivasiya o‘z so‘zini aytdi. Odam o‘z kelajagini turlicha tasavvur qiladi. Biroq hayot boshqa narsalarni tayyorlab qo‘yar ekan. Buni to‘g‘ri qabul qilish kerak bo‘ladi. O‘tgan mavsum men o‘ylagandek kechmadi.
- Siz uchun yangi hayot boshlanadimi?
- Keyinchalik nima bilan shug‘ullanishim haqida gapirsam, endi pul uchun o‘ynamoqchi emasman. Qaytib oilamning ortimdan ko‘chib yurishini istamayman. Shunday ekan, nimanidir yangilash vaqti keldi. Hali hayotim oldinda va ko‘p narsa qilishim kerak. Futbol umrimning muhim bir bo‘limi edi. Omadim kelgani - 34 yoshimgacha ishlamadim. Aksincha, o‘zim yoqtirgan mashg‘ulotimni qildim. Mashg‘ulotlarga borishdan baxtli edim. Endi yana g‘ayratimga g‘ayrat qo‘shadigan ish topishni istayman.
- Faoliyatingizni yakunlashingiz borasidagi qarorni oilangiz qanday qabul qildi?
- Avvaliga ishonishmadi. Shunchaki, qizishganida aytvordi, deb o‘ylashdi. Keyin jiddiy ekanini tushunishdi. Albatta, oilam buni og‘ir qabul qildi. Chunki jismoniy holatim yana o‘ynashim uchun imkon beradi. Ammo qarorimni ruhiy holatimdan kelib chiqib qabul qildim.
- Faoliyatingizni Xabi Alonso bilan teng yakunladingiz.
- Ha. Lekin u chiroyli tarzda, asosiy eshikdan chiqib ketdi. Xabi top- klubda yuqori saviyada o‘ynab, faoliyatini tugatdi. Uning uchun xursandman, hamisha shunday yakunlashni istardi. Yana Alonso «Bernabeu»da ham xayrlashdi. Vaholanki, raqib jamoa tarkibida edi. Shunga qaramay, stadion Xabini olqishlar bilan kuzatib qo‘ydi. Xabi boshqalardan ko‘ra qarorimni to‘g‘ri qabul qildi.
- Madridga yashash uchun qaytyapsiz. Nima bilan shug‘ullanishingizni hal qildingizmi?
- Nima bilandir shug‘ullanishim aniq. Chunki ishsiz yurolmayman. Biroz hordiq chiqarganimdan so‘ng ishga kirishaman.
- Yaqin yillarda o‘zingizni «Real»da ishlayotgandek tasavvur qilyapsizmi?
- «Real»dagilar klubda ishlamoqchi ekanimni bilishadi. U yer mening uyim, hayotim. Ammo o‘zim qo‘ng‘iroq qilib ish so‘ramayman. Agar chaqirishsa, bajonidil boraman. Umuman olganda, keyinchalik nima ish bilan shug‘ullanishimni bilmayman. Chunki faoliyatimni endi yakunladim. Bu haqda ko‘pchilik bilmaydi. Negaki, buni shu intervyu orqali rasman ma’lum qilyapman. Sport direktori lavozimida ishlashim, murabbiylik lisenziyasini olishim mumkin.
- Aytaylik, siz «Real» sport direktorisiz. Qanday transferlarni amalga oshirgan bo‘lardingiz?
- «Real»da jahonning eng yaxshi sport direktori ishlaydi. Jamoa tarkibida esa haqiqiy yulduzlar to‘p surishmoqda. Ayni payt jamoaning yangi falsafasi menga ma’qul tushdi. Negaki, tarkibga mahalliy yoshlarni jalb qilishmoqda. Aytish mumkinki, «Real» hozir «oltin davri»ni boshdan kechirmoqda.
- Agar murabbiy bo‘lganingizda, asosiy tarkibning muqim o‘yinchisi kim bo‘lardi?
- Menda unday o‘yinchilar bo‘lmasdi. Kimnidir alohida ajratib olish qiyin. Hozir birinchi va ikkinchi jamoa haqida gapirishyapti. Aslida esa, «Real»da bunaqasi yo‘q. Madridda ikkita birinchi jamoa bor.
- «Real»da o‘ynaganingizda sizga yoqadigan eng yaxshi narsa nima edi?
- Har kuni jahonning eng yaxshi futbolchilari bilan birga mashg‘ulot o‘tash.
