FIFA ijro qo‘mitasining sobiq a’zosi va KONKAKAF sobiq bosh kotibi amerikalik Chak Bleyzer 72 yoshidan hayotdan ko‘z yumdi.
U FIFAdagi korrupsiya jinoyat ishi bo‘yicha asosiy guvohlardan biri edi. Mulozim to‘g‘ri ichak saratoni, diabet va qon tomirlari kasalligidan vafot etdi.
AP xabariga ko‘ra, 2013 yilda Bleyzer soliqlarni to‘lashdan bo‘yin tovlaganini tan oldi. Shuningdek FIFA ijro qo‘mitasi a’zolari pora olganini aytib o‘tdi. Uning ma’lumotlari 1998 va 2010 yilgi Jahon chempionati mezbon davlatini aniqlash jarayoniga taalluqli bo‘lgan. Aynan uning ko‘rsatmalari asosida, 2015 yilning may oyida tashkilotning yuqori mansabdorlari hibsga olingan.
2015 yilning iyulida FIFA Bleyzerni futbol bilan bog‘liq bo‘lgan barcha faoliyat turidan umrbod chetlatgan edi.
