Avstriya mezbonlik qilgan futbol bo‘yicha shifokorlar o‘rtasidagi Jahon chempionati o‘z yakuniga yetdi va unda O‘zbekiston terma jamoasi 4-o‘rinni qo‘lga kiritdi.

Morell Cup nomini olgan musobaqaning yarim finalida o‘zbekistonlik shifokorlar Chexiyaga qarshi maydonga tushib, 0:1 hisobida imkoniyatni boy bergandi. Qayd etish kerak, chexlar turnirning amaldagi g‘olibi hisoblanadi.

Bir necha soat oldin musobaqaning 3-o‘rni uchun O‘zbekiston va Shvesiya termalari saf tortdi. Bellashuv shvedlarning 2:0 hisobidagi g‘alabasi bilan yakuniga yetdi.

O‘zbekiston terma jamoasi turnirning «A» guruhidan joy olgan bo‘lib, ilk turda AQSHni 4:1 hisobida mag‘lub etgan, keyinroq mezbon Avstriya bilan 0:0 hisobida durang o‘ynagandi. Braziliya ustidan qozonilgan 2:0 hisobidagi g‘alaba O‘zbekiston terma jamoasiga guruh peshqadamligini taqdim etdi.

Chorakfinalda esa Buyuk Britaniya termasi ortda qoldirilgandi — 1:0.