«Arsenal» bosh murabbiyi Arsen Venger yana bir ajoyib ko‘rsatkichga erishdi.
Fransiyalik mutaxassis klub bosh murabbiyi bo‘lib ishlash muddati borasida «Arsenal»ning rekordchisi edi. Endi u bu ko‘rsatkich bo‘yicha APL rekordini ham yangiladi.
Ma’lumki, «MYU» klubining afsonaviy murabbiyi Aleks Fergyuson jamoa bosh murabbiyi sifatida 7582 kun faoliyat olib borgan. Bugun Venger «kanonirlar» ustozi bo‘lganiga 7583 kun to‘ldi. Bu ko‘rsatkich bo‘yicha uchinchi o‘rinni katta farq bilan orqada borayotgan Devid Moyes egallab turibdi – 4082 kun.
Eslatib o‘tamiz, Arsen Venger 1996 yil 12 oktyabr kunidan «Arsenal» bosh murabbiyi sifatida ishlamoqda. Shu kungacha u APL doirasida 790 o‘yin o‘tkazgan. 1998, 2002 va 2004 yillarda esa Angliya chempioni bo‘lgan. Uning shartnomasi yana ikki yil amal qiladi.
