WSB musobaqasining 2017 yilgi mavsumi o‘z yakuniga yetdi. Unda g‘oliblik Qozog‘istonning Astana Arlans jamoasiga nasib qildi.

Hal qiluvchi final jangiga Astana mezbonlik qildi. Bir yil muqaddam Toshkentda bo‘lib o‘tgan finalda ham Astana Arlans va Cuba Domadores jamoalari to‘qnash kelgan bo‘lib, unda kubaliklar zafar quchishga muvaffaq bo‘lgandi. Oradan bir yil o‘tib qozog‘istonlik bokschilar buning uchun revansh oldi.

Ketma-ket 10 ta jangda g‘olibni aniqlab bo‘lmadi. 5 ta vaznda mezbonlar zafar quchgan bo‘lsa, yana 5 tasida kubaliklar muvaffaqiyat qozondi. Shu tariqa boksning penaltilar seriyasiga navbat yetib keldi. Unda 52 kilogrammgacha bo‘lgan har ikki mamlakat bokschilari ringga chiqdi. Hal qiluvchi mazkur jangda ustunlik Astana Arlans sportchisi tomonida bo‘ldi.

Astana Arlans — Cuba Domadores 6:5

-49 kg: Temirtas Jusupov — Yoxanus Argilagos 3:0

-52 kg: O‘ljas Sattibayev — Yosbani Veytia 0:3

-56 kg: Ilyas Suleymanov — Xavyer Ibanes 3:0

-60 kg: Zakir Safiullin — Lazaro Alvares 2:1

-64 kg: Dilmurat Mijitov — Endi Kruz 1:2

-69 kg: Aslanbek Shimbergenov — Ronel Iglesias 3:0

-75 kg: Abilxon Amanqul — Arlen Lopes 0:3

-81 kg: Arman Risbek — Xulio La Kruz 0:3

-91 kg: Anton Pinchuk — Erislandi Savon 0:3

+ 91 kg: O‘ljas Bokayev — Yoandri Toirak 3:0

Hal qiluvchi jang

-52 kg: O‘ljas Bayniyazov — Frenk Zaldivar 2:1

Cuba Domadores va Astana Arlans jamoalari shu kungacha ikki marotabadan ushbu musobaqada bosh mukofotni qo‘lga kiritgandi. Astana Arlans uchinchi bor musobaqada zafar quchib, WSB rekordini o‘rnatdi.

Musobaqada O‘zbekiston sharafini himoya qilgan Uzbek Tigers chorak finalda Cuba Domadores sportchilariga 3:7 hisobida imkoniyatni boy berib qo‘ygandi. Astana Arlans’ga qarshi guruh bosqichida kechgan o‘zaro janglar esa Astanada qozog‘istonliklarning 4:1 hisobidagi, Toshkentda o‘zbekistonliklarning xuddi shu hisobdagi g‘albasi bilan yakuniga yetgandi.