Iroda To‘laganova boshqaruvidagi tennis bo‘yicha O‘zbekiston ayollar terma jamoasi norasmiy Jahon Chempionati sanalmish Federasiyalar Kubogi saralashida ishtirok etmoqda.
Saralashning Osiyo/Okeaniya mintaqasi ikkinchi guruhida kurash olib borayotgan qizlarimiz 19 iyul sanasida turkmanistonlik tennischilarni 3:0 hisobida mag‘lub etgan edi
Kecha esa sportchilarimiz Yangi Zelandiya termasiga ham hech qanday imkoniyat qoldirmagan holda g‘alabani qo‘lga kiritishdi.
Dastlab, Nigina Abduraimova Peyj Xurianni 2:1 (7:5, 4:6, 7:6) hisobida mag‘lub etdi.
O‘zbekistonning birinchi raketkasi Sabina Sharipova esa Erin Rutliffga hech qanday imkoniyat qoldirmadi 2:0 (6:3, 6:1).
Juftlik bahslarida ishtirok etgan Oqgul Omonmurodova/Kamola Umarova dueti Joanna Karsuel/Erin Rutliff tandemiga qarshi bahs olib bordi. Ushbu o‘yin 2:0 (6:3, 6:4) hisobida hamyurtlarimiz foydasiga yakuniga yetdi.
Shu tariqa Iroda To‘laganova boshchiligidagi O‘zbekiston ayollar jamoasi Yangi Zelandiyani ham 3:0 hisobida mag‘lub etib, keyingi bosqichda Indoneziya termasiga qarshi bahs olib boradigan bo‘ldi.
